Қазақстанда кибербуллинг мәселесі қайта талқыланып жатыр. Бұған әнші Қайрат Нұртастың қызына қарсы желі қолданушылардың жаппай жазған қорлау пікірлері себеп болды. Оқиғаға байланысты Оқу-ағарту министрлігі мен заңгерлер пікір білдірді, - деп хабарлайды aqshamnews.kz 31 арнаға сілтеме жасап.
Танымал тележүргізуші Динара Сәтжанның үндеуі Қазақстандағы кибербуллинг мәселесін қайтадан күн тәртібіне шығарды. Журналист өз кезегінде Қайрат Нұртастың қызына бағытталған теріс пікірлердің кесірінен күйзеліске түскенін бірнеше рет көргенін айтқан.
"Бұл - барлық балаға қатысты мәселе. Бізде заң бар және бұл қылмыстық жауапкершілікті тудыруы мүмкін. Пікір жазатындар көбіне балалар емес, ересек адамдар", - деді Сәтжан.
Қазақстанда кәмелетке толмағандарға қатысты ұжымдық қорлауға және интернет арқылы қорлауға қарсы жауапкершілік бар. Ең маңыздысы - баланың бұл туралы ересектерге қорықпай айтуы, әрі одан кейін құқық қорғау органдары шара қолдануы тиіс.
"Егер бізге мұндай ақпарат келіп түссе, әрине, біз Мәдениет және ақпарат министрлігіне жүгінеміз. Олар өз кезегінде уәкілетті органдарға - ҰҚК-ға жүгінеді. Сонымен қатар бізде ақпараттық кибербақылау жүйесі бар және біз оны белсенді қолданамыз", - деді Оқу-ағарту министрлігінің Балалардың құқықтарын қорғау комитеті басқармасының басшысы Ләззат Есмұханова.
Ересектердің жауапкершілігі туралы заңгерлер де ескертті.
"Осыған байланысты моральдық зиянды өтеу талап етуге болады. Қорлау әрекетімен айналысатындар мұны түсініп, білуі керек. Егер ауыр салдары болса, онда қылмыстық жауапкершілік те қарастырылуы мүмкін", - деді заңгер Сергей Уткин.