Алматы мемлекетік архивінде Қазақстанның Халық жазушысы, ақын Қадыр Мырза Әлінің 90 жылдық мерейтойына орай «Қадыр Мырза Әлі» қоғамдық қорының қатысуымен «Адам жанының суреткері Қадыр Мырза Әлі» атты еске алу кеші өтті.
Іс-шараға Алматы қаласының "Қадыр Мырза Әлі" қоғамдық қорының өкілдері мен зиялы қауым, сондай-ақ студенттер мен мектеп оқушылары қатысты.
- Қадыр Мырза Әлі -Алматы қаласының Мемлекеттік архивінің № 662 қор иегері. Бұл кісінің Орал қаласында мұражайы бар. Ал барлық құжаттары мен қолжазбалары біздің архивте сақталған. Бүгін 90 жылдық мерейтойға орай фотокөрме және мерекелік кеш ұйымдастырылды, - деді Алматы мемлекетік архивінің директоры Абзал Ботанов.
Еске салу кешінде эстрада әншілерінің орындауында ақынның сөзіне жазылған әндер шырқалды.
- Осыдан 14 жыл бұрын Қадыр ағамыздың үлкен жүрегі өкінішке қарай тоқтады. Бірақ сол күннен бастап Қадыр ағамыздың екінші ғұмыры басталды. Ол кісінің тамаша әдеби мұрасы, ұшан теңіз поэзиясы - жалпы ол кісінің қасиетті қаламынан туған дүниелерді халық арасында насихаттау, жастарға жеткізу бағытында жұмыс істеу керек болды. Бұл бағытта 14 жыл бұрын «Қадыр Мырза-Әлі» қоғамдық қоры құрылды, - деді «Қадыр Мырза-Әлі» қоғамдық қорының директоры Донеділ Қажымов.