Перизат Қайрат пен оның анасы Ғайни Алашбаеваға қатысты іс бойынша өткен отырыста прокурор Арман Қазекен айыптау тарапы соттан қандай жаза тағайындауды сұрап отырғанын айтты, - деп хабарлайды aqshamnews.kz тілшісі.
Тараптардың жарыссөзі кезінде прокурор Перизат Қайратты 10 жылға бас бостандығынан айырып, мүлкін тәркілеуді сұрады. Ал оның анасы Ғайни Алашбаеваға – орташа қауіпсіздік мекемесінде 8 жыл бас бостандығынан айыру жазасын сұрады.
Еске сала кетейік, кеше Перизат Қайрат ісі бойынша сот отырысы жабық режимде өтті. Бұл шешім банк құпиясын қамтитын құжаттар сияқты құпия деректердің қаралуына байланысты қабылданған.
Соттың баспасөз қызметі таратқан мәлімет бойынша, күннің алғашқы жартысында заттай дәлелдемелер зерттеліп, тараптар бірнеше өтініш білдірді, сондай-ақ айыпталушы Перизат Қайраттан жауап алынды. Ал оның анасы Ғайни Алашбаева өз құқығын пайдаланып, жауап беруден бас тартты.
Перизат Қайрат ісі
Перизат Қайрат – Қазақстандағы қоғам белсендісі әрі кәсіпкер. Ол 2021 жылғы маусымда құрылған қайырымдылық қордың негізін қалаушы және басшысы ретінде танымал.
2024 жылғы қарашада Перизат Қайрат 1,5 миллиард теңгеден астам қаражатты жымқырды деген күдікпен ұсталды. Бұл қаражат су тасқынынан зардап шеккендерге көмек көрсету мақсатында жиналған болатын. Тергеу мәліметінше, қаражаттың бір бөлігі жеке мақсаттарға – жылжымайтын мүлік, автокөлік және қымбат шетелдік сапарларға жұмсалған.
Сондай-ақ Перизат Қайраттың қор қаражатын қолма-қол ақшаға айналдыру үшін дос-жарандары мен туыстарын тартқаны және оларға бұл қызметтері үшін сыйақы төлегені де айтылған.