Бас прокуратура 15 наурызда өтетін республикалық референдум қарсаңында азаматтарға үндеу жасады, – деп хабарлайды aqshamnews.kz тілшісі.
Ведомство мәліметінше, Мемлекет басшысының 2026 жылғы 11 ақпандағы №1170 Жарлығына сәйкес 15 наурыз күні «Жобасы бұқаралық ақпарат құралдарында 2026 жылғы 12 ақпанда жарияланған Қазақстан Республикасының жаңа Конституциясын қабылдайсыз ба?» деген сауал бойынша республикалық референдум өтеді.
Қазір азаматтар мен қоғамдық бірлестіктер референдумға байланысты үгіт жұмыстарын жүргізіп жатыр. Алайда қолданыстағы заңнамаға сәйкес үгіт жүргізу 2026 жылғы 14 наурыз сағат 00:00-де аяқталады.
Осыған байланысты 14 және 15 наурыз күндері, яғни референдум қарсаңындағы күні мен дауыс беру күні үгіт жүргізуге толық тыйым салынады.
Сонымен қатар, бұқаралық ақпарат құралдарында, онлайн-платформаларда қоғамдық пікірге сауал салу нәтижелерiн, референдум нәтижелеріне болжамдарды, референдумға байланысты өзге де зерттеулерді жариялауға жол берілмейді.
Референдум күні дауыс беруге арналған үй-жайда немесе пунктте қоғамдық пiкiрге сауал салуды жүргізуге тыйым салынады (Конституциялық заңның 7-1-бабы және «Қазақстан Республикасындағы сайлау туралы» Конституциялық заңның 28-бабының 9-тармағы).
Бұл құқықтық талаптарды бұзу кінәлі тұлғалардың әкімшілік жауаптылыққа тартылуына әкеп соғады.
Нақты айтқанда, 2026 жылғы 14 және 15 наурызда үгiтті жүргізгені үшін, яғни оған тыйым салынған кезеңде, Қазақстан Республикасының Әкімшілік құқық бұзушылық туралы кодексінің (бұдан әрі – ӘҚБтК)102-бабы бойынша жауаптылық туындайды.
Қоғамдық пікірге сауал салудың нәтижелерін жариялағаны немесе референдум күні дауыс беруге арналған үй-жайда немесе пунктте оны жүргізгені үшін ӘҚБтК-нің 120-бабының 2-бөлігі бойынша жауаптылық көзделген.
Мазмұндалғанды ескере отырып, Қазақстан Республикасының Бас прокуратурасы заңдылықты қамтамасыз ету және құқық бұзушылықтардың алдын алу мақсатында референдумға қатысатын барлық азаматтарды аталған заңнама талаптарын қатаң сақтауға және құқыққа қайшы әрекеттерге жол бермеуге шақырады.