Мемлекет басшысы соңғы жеті жылда елімізде жүзеге асырылған реформалардың нақты нәтижелеріне тоқталды, – деп хабарлайды aqshamnews.kz тілшісі.
Экономикалық өсім мен инвестиция
Президент экономикалық өсім, инвестиция, кәсіпкерлік, тұрғын үй құрылысы, білім беру, денсаулық сақтау және жол инфрақұрылымы салаларындағы көрсеткіштерді атап өтті.
«Азаматтарымыз елімізде жүргізілген реформалардың тікелей куәгері болып, сол өзгерістердің нақты нәтижесін көріп отыр.
Соңғы 7 жылда жалпы ішкі өнім 29 пайызға артып, 306 миллиард долларға жетті.
Алтын-валюта резерві және Ұлттық қор активтерінің көлемі 138 миллиард доллардан асты. Осы кезеңде елімізге 162 миллиард доллардан астам инвестиция тартылды.
Шағын және орта бизнестің экономикадағы үлесі 40 пайыздан асты.
Қазақстанда жыл сайын 20 миллион шаршы метрден астам тұрғын-үй бой көтереді.
2019 жылдан бастап, 1 миллионнан астам оқушыға арналған 1342 мектеп салынды.
Азаматтардың орташа өмір сүру ұзақтығы 76 жасқа жетті.
Сондай-ақ 1200-ден астам денсаулық сақтау нысаны ашылды.
Осы уақыт ішінде 35 мың шақырымнан астам автокөлік жолы салынып, жөнделді. Мұның бәрін тарихымыздағы ең жоғары көрсеткіш деуге болады.
Белсенді жұмыстың нәтижесінде Қазақстан әлемнің бәсекеге қабілетті 40 елінің қатарына енді», – деді Президент.
Алдағы жоспарлар
Мемлекет басшысы халықтың әл-ауқатын арттыру бағытындағы жұмыс алдағы уақытта да жалғасатынын жеткізді.
«Біз алдағы уақытта да халықтың әл-ауқатын жақсарту үшін табанды еңбек ете береміз», – деді Қасым-Жомарт Тоқаев.