Астанада жаңадан құрылған «Әділет» партиясының құрылтай съезі өтті. Жиында делегаттар бұрынғы Президент Әкімшілігінің басшысы Айбек Дадебайды партия төрағасы етіп бірауыздан сайлады, – деп хабарлайды aqshamnews.kz тілшісі.
Съезге еліміздің барлық өңірінен 1000-ға жуық делегат қатысты. Жиын барысында партияның бағдарламасы мен жарғысы бекітіліп, саяси кеңес құрамы жасақталды.
Партия әділеттілік, жауапкершілік және патриотизм құндылықтарын басты бағдар ретінде ұстанатынын мәлімдеді. Айбек Дадебай алғашқы сөзінде «Әділеттің» негізгі міндеті – азаматтардың заңға және әділдікке деген сенімін нығайту екенін атап өтті.
Оның айтуынша, бұл ұстанымдар Президент Қасым-Жомарт Тоқаев жүргізіп отырған саяси реформалар бағытымен үндеседі.
Партияның саяси кеңесі бюросына Айбек Дадебаймен қатар қоғам және саясат өкілдері енді. Олардың қатарында саясаттанушы Марат Шибутов, журналист Рауан Кенжеханұлы және бұрынғы цифрлық даму министрі Бағдат Мусин бар.
Айта кетейік, Айбек Дадебай Президент Әкімшілігінің басшысы қызметін 2024 жылдың ақпанынан 2026 жылдың 5 мамырына дейін атқарды. Кейін бұл қызметке бұрынғы бірінші вице-премьер Роман Скляр тағайындалған болатын.
«Әділет» партиясы алдағы уақытта ашықтық пен есептілік қағидатын ұстанып, нақты мәселелерді шешуге бағытталған жүйелі жұмыс жүргізетінін мәлімдеді.