Қостанайда полиция қызметкері бір кафеде мас болып, үлкен дау шығарды.
Оқиға кезінде бірнеше адам қонақты сыртқа шығаруға тырысқан, ал ол болса көшеде төбелесуге дайын болған, деп хабарлайды aqshamnews.kz.
Оқиғаның видеосы жергілікті «ТоболИнфо» басылымында жарияланды. Видеода Қостанай облысы полиция департаментінің жеке құрам бойынша аға инспекторы Болат Ибрашевты кафеден сүйемелдеп алып шығып бара жатқанын көруге болады.
Оқиға өткен мереке күндері орын алған. Облыстық полиция департаменті оқиғаға қатысты пікір білдірді.
«Оқиға бойынша қызметтік тергеу жүргізілуде. Тергеу барысында қызметкердің әрекеттеріне құқықтық баға беріліп, қызметкер мен оның басшылығының жауапкершілігі анықталатын болады», — деп мәлімдеді ведомство өкілдері.
Сондай-ақ, мереке күндері құқық қорғау органдарының қызметкерлері күшейтілген режимде жұмыс істегені хабарланды.
