Биыл Наурыз мерекесі елімізде ерекше тойланып жатыр.
Жаңаша мәнге ие болған мерекедегі мейірім күні ІІМ М.Есболатов атындағы Алматы академиясында да өзгеше аталып өтті, деп хабарлайды Almaty-akshamy.kz Polisia.kz-ке сілтеме жасап.
Атап айтқанда, тағдырдың ауыртпалығына ұшыраған балаларға көмек қолын созып жүрген “Менің Арманым” корпоротивтік қорының өтінішімен 11 жастағы Нұрасыл есімді жеткіншек академияға келіп, іргелі оқу орнының тыныс-тіршілігімен танысты. “Менің Арманым” қорының ондағы мақсаты – болашақта полиция қызметкері болуды армандайтын Нұрасылды академия өмірімен таныстыру.
Арманшыл баланы үлкен ізетпен қарсы алған академия басшылығы оған зор мүмкіндік тудырды. Нұрасыл академиядағы музейдің жәдігерлерін тамашалап, спорт залдағы түрлі жаттығуларды көріп, риза болды. Сондай-ақ ол полиция қызметкерлері қолданатын қарулармен де танысты. Ауыр дертпен күресіп жүрген Нұрасылдың қалауын орындап, мейірімділік танытқан академия басшылығы естелікке сыйлық ұсынып, оны шексіз қуанышқа бөледі. Курсанттардың өмірімен танысқан жеткіншек талпынса өмірдегі арманының орындалатынына сеніммен аттанды.