Павлодар облысында 2019 жылы отбасылық жиын өткізу үшін бірнеше жерден несие алып, кейін оны өтей алмай қалған екі баланың анасы сотта жеңіске жетіп, ресми түрде банкрот деп танылды, – деп хабарлайды aqshamnews.kz тілшісі.
Іс материалдарына сәйкес, әйелдің банктер алдындағы жалпы берешегі 6 344 644 теңгеге жеткен. Алғашында бірінші сатыдағы сот оның тұрақты табысы жоқ екенін негізге алып, арызын кері қайтарған.
Алайда бұл шешіммен келіспеген борышкер апелляциялық шағым түсіріп, істің қайта қаралуына қол жеткізді. Павлодар облыстық соты істі зерделеу барысында қарыз көлемі заңда белгіленген шектен асатынын және міндеттемелердің 12 айдан астам уақыт бойы төленбегенін ескерген.
Сот алқасы сондай-ақ қаржы басқарушысы қарыз сомасын дұрыс есептемегенін анықтап, әйелдің әрекетінен ешқандай арам пиғыл байқалмағанын атап өтті. Судьялар тұрақты жұмыс пен табыстың болмауы азаматты банкрот деп танудан бас тартуға негіз емес екенін нақтылады.
Нәтижесінде бірінші сатыдағы сот шешімінің күші жойылып, екі баланың анасына қатысты банкроттық рәсімін қолдану туралы жаңа шешім заңды күшіне енді.
Айта кетейік, бұған дейін Мәжіліс депутаттары халықтың несие алып той жасау әдетін бірнеше рет сынға алған болатын. 2025 жылы депутат Ардақ Назаров отбасылық мерекелер үшін банктерден қарыз беруге толықтай тыйым салуды ұсынған еді.