Павлодар облысында «Turkey PVL» ЖШС құс фабрикасының құрылысының екінші кезеңін аяқтады.
«Turkey PVL» – өңірде күркетауық етін өндіруге маманданған жалғыз кәсіпорын. Компанияның өнімі Қазақстанда «Павлодар күркетауығы» брендімен танымал, деп хабарлайды aqshamnews.kz.
Кәсіпорын вертикалды интеграцияланған: күркетауықтарға арналған жем өздерінің құрама жем зауытында өндіріледі, құс өсіру мен инкубациясы да кәсіпорынның өз ішінде жүзеге асырылады. Бұл өндірістің барлық кезеңдерінде жоғары сапаны қамтамасыз етуге мүмкіндік береді.
2025 жылдың басында кәсіпорындағы құс басы саны 95 мыңды құрады, ал өндіріс көлемі 3 мың тоннаға жетті. Компания өндіріс қуатын арттыру жұмыстарын жалғастыруда: 2024 жылы фабрикада жылдық қуаттылығы 3,5 мың тонна болатын 10 құс қорасы пайдалануға берілді.
Жалпы, инвестициялық жобаны толық жүзеге асырғаннан кейін құс фабрикасының жылдық қуаттылығы 8 мың тоннаға жетеді.