Қазақстан күміс сыйлаған шахматшыларын марапаттады ма?
Бүкіләлемдік шахмат Олимпиадасында қола жүлдегер атанған Өзбекстан құрамасын Ташкентте жанкүйерлер көтеріңкі көңіл күймен қарсы алып, қошемет көрсетті, деп хабарлайды aqshamnews.kz.
Президент атынан команда құрамында болған Нодирбек Абдусатторов, Нодирбек Якуббоев, Жавохир Синдаров, Шамсиддин Вахидов және Жахонгир Вахидовке BYD Chazor маркалы көлік берілді. Сондай-ақ қаржылай сыйақы да табысталды.
Еске сала кетсек, Будапеште өткен 45-ші Олимпиада ойындарына Қазақстан құрамасы да қатысып қыздарымыз күміс жүлдегер атанып қайтты. Ал алтынды Үндістан құрамасы алған болатын.
Алайда арнайы өткізілетін Олимпиада ойындарында жүлде алған отандастарымызға Мемлекет тарапынан сыйақы беру қарастырылмаған. Федерация тарапынан ғана марапатталуы мүмкін.
Әзірше Президент шахматтан әйелдер құрамасын құттықтауымен шектеліп тұр.