Мемлекет басшысы Қасым- Жомарт Тоқаев Қазақстан халқына Жолдауында биылғы жылды «Жұмысшы мамандықтары жылы» деп жариялады.
Бұл бастаманы сала өкілдері жұмысшы мамандығының беделін арттырып қана қоймай, техникалық және кәсіптік білім беру жүйесінің реформасының іске асуына жасалып отырған қолдау деп қабылдап, осы мақсатты жүзеге асыруға кіріскен еді. Сондай жүйелі жұмыстың бірі – қала көлемінде өтіп жатқан «Кәсіп таңдау – бұл маңызды!» деп аталатын кәсіби бағдарлау жұмысы.
Қазіргі таңда Алматы құрылыс-техникалық колледжінің инженерлік-педагогикалық ұжымы мектеп оқушыларына арнап, шеберлік сыныптары мен сынақ- тәжірибелік сабақтарын өткізуді қолға алды.
Олар өндірістік оқыту шеберлерімен шеберлік сыныптарын өткізіп, оқушыларға мамандықтың қыры мен сырын үйретіп жатыр. Директордың оқу- өндірістік жұмыс жөніндегі орынбасары Эльвира Бақтыбаеваның айтуынша, аталмыш іс-шараларды өткізудегі басты мақсат – кәсіби бағдарлық жұмыс барысында өндірістік оқыту жүргізілетін жабдықтарды көрсету, таңдалған кәсіптің болашағына көз жеткізіп, өз әлеуетін ашу мүмкіндігін сынға салу болып отыр.
Сонымен қатар, колледжде өтіп жатқан іс-шараға мектеп оқушылары мен мұғалімдері, ата-аналар да қатысып жатыр. Оқушылар колледждің мамандықтары мен біліктіліктері туралы өзекті мәліметтерді алады, студенттер өндірістік оқыту жүргізілетін жабдықтармен танысады.
Іс-шараның маңыздылығына келсек, бұл оқушылар үшін болашақ мамандықты таңдауда жауапты қадам болмақ.