Көмір сататын нүктелерде көмір қоры жеткілікті.
Қазақстан Үкіметі өткен жылы мемлекетте қана көмір өндірілгенін жария етті, деп хабарлайды Almaty-akshamy.kz.
«Қазақстандағы көмір өндіруші компаниялары 2021 жылы 111,7 млн тонна көмір өндірген, бұл өткен жылғы тиісті кезеңмен салыстырғанда 102%-ды құрайды. Өз кезегінде энергия өндіруші кәсіпорындарға 59,3 млн. тонна көмір тиелді, бұл өткен жылғы көрсеткіштермен салыстырғанда 0,8%-ға артық. Ал, өнеркәсіптік кәсіпорындарға 6,8 млн тонна көмір жөнелтілді. Бұл 2020 жылмен салыстырғанда 21,4%-ға көп. Сонымен қатар, коммуналдық-тұрмыстық қажеттіліктерге және халыққа 10,7 млн тонна көмір тиелді, бұл өткен жылғы көрсеткіштермен салыстырғанда 0,9%-ға артық», - делінген Индустрия және инфрақұрымдылық министрліктің баспасөз қызметінің хабарламасында.
Айта кету керек, жылыту маусымы басталған кезде Министрлік жергілікті атқарушы органдардың деректері негізінде Коммуналдық-тұрмыстық сектор және халық үшін көмір өнімін тұтынудың 2021-2022 жылдар кезеңіне арналған жоспарын қалыптастырды.
2022 жылғы 1 ақпандағы жағдай бойынша жоспар бойынша көзделген 9,3 млн тоннаның 9,28 млн тоннасы аймақтарға жеткізілді, яғни 99,7%, оның ішінде:
- коммуналдық-тұрмыстық секторға жоспар бойынша көзделген 3,0 млн тоннаның 2,96 млн. тоннасы жеткізілді, яғни 99%;
- халыққа жоспар бойынша көзделген 6,336 млн. тоннаның 6,322 млн. тоннасы жеткізілді, яғни 99, 7%.
Жергілікті атқарушы органдардың мәліметі бойынша көмір сататын нүктелерде көмір қоры жеткілікті.
Естеріңізге сала кетейік, көмір бағасының өсуіне жол бермеу мақсатында Индустрия және инфрақұрылымдық даму министрлігі Тау-кен өндіру және тау-кен металлургия кәсіпорындарының республикалық қауымдастығымен меморандумға қол қойды. Аталмыш қауымдастық «Қаражыра» АҚ, «Шұбаркөл Көмір» АҚ және «Богатырь Көмір» ЖШС көмір өндіруші компаниялардың мүдделерін білдіреді. Осындай меморандумдарға өңірлердің әкімдіктері мен әлеуметтік көмірді көтерме жеткізушілер де қол қойды.