Оқиға Өскеменде футбол матчы кезінде болған, деп хабарлайды aqshamnews.kz тілшісі.
Өскеменде қоғамдық тәртіпті сақтау және азаматтардың қауіпсіздігін қамтамасыз ету мақсатында қызмет атқарып жүрген ҚР ІІМ Ұлттық ұланының 5518 әскери бөлімінің әскери қызметшілері адасып кеткен бес жасар баланы тауып, ата-анасына аман-есен табыстады.
Оқиға Өскеменде "Алтай" және "Ордабасы" футбол командалары арасында өткен матч кезінде болған.
Шамамен сағат 18:50-де матчтың үзілісі кезінде патрульдік жасақ әскери қызметшілеріне бес жасар баланың жоғалғаны туралы хабарлама келіп түскен. Әскери жасақ бастығы ақпаратқа жедел әрекет етіп, баланың сыртқы белгілері мен өзге де мәліметтер көрсетілген бағыттаманы жеке құрамға жеткізді.
Көп ұзамай әскери жасақ бастығы Диас Нұрдыбаев, патрульшілер қатардағы Ербол Айдар мен Сүгір Мұхаммед полиция қызметкерлерімен бірлесіп, баланы іздеуге кірісті.
Жедел ұйымдастырылған іздестіру жұмыстарының нәтижесінде бала көп ұзамай табылып, ата-анасына аман-есен тапсырылды.
Оқиғадан кейін полиция қызметкерлері ата-аналарға адам көп жиналатын орындарда балаларды қараусыз қалдырмай, олардың қауіпсіздігіне барынша мұқият болу қажеттігін түсіндірді.