Партиялық тізімге 19 адам енген.
Орталық сайлау комиссиясы Жалпыұлттық-социал демократиялық партиясының Мәжіліс сайлауына ұсынған партиялық тізімін тіркеді, деп хабарлайды Almaty-akshamy.kz
ОСК мүшесі Анастасия Щегорцованың айтуынша, ЖСДП-ның партиялық тізіміндегі 19 адамның 6-уы – әйел, қалғаны – жастар мен мүгедектігі бар жандар.
"Жалпыұлттық социал-демократиялық партиясының партиялық тізіміне енгізілген барлық адам Конституция және "Сайлау туралы" Конституциялық заңның талаптарына сай келеді", - деді Щегорцова орталық сайлау комиссиясының отырысында.
Ол ЖСДП алдыңғы парламент сайлауына қатыспағанын атап өтті. Сондықтан заңнамаға сәйкес, партия тізімін тіркеу үшін ОСК шотына сайлау жарнасын енгізуге тиіс. Жарна сомасы партиялық тізімге енгізілген әрбір адам үшін ең төменгі жалақының 15 еселенген мөлшері – 1 050 000 теңгені құрайды.
"Жалпыұлттық социал-демократиялық партиясы сайлау жарнасын толық көлемде төледі", - деді ОСК мүшесі.
Осылайша Орталық сайлау комиссиясы ЖСДП-ның Мәжіліс сайлауына ұсынған кандидаттар тізімін бекітті.
Бұған дейін Қазақстан халық партиясының партиялық тізімі бекітілген болатын.