Алматыдағы №36 қалалық емханаға Орталық Азияның төрт елі — Өзбекстан, Тәжікстан, Қырғызстан және Түрікменстан өкілдерінен құралған ЮНИСЕФ делегациясы арнайы келді, – деп хабарлайды aqshamnews.kz тілшісі.
Аталған емхана қаланың қарқынды дамып келе жатқан аудандарының бірі Наурызбай ауданы тұрғындарына қызмет көрсетеді.
Сапарға Қазақстан Республикасы Денсаулық сақтау министрлігінің Ана мен бала денсаулығын сақтау департаментінің өкілі Мағрипа Ембергенова, сондай-ақ Алматы қаласы Қоғамдық денсаулық сақтау басқармасының ана мен бала денсаулығын сақтау бөлімінің басшысы Жадыра Ахметова қатысты.
№36 қалалық емхананың директоры Гүлжайнат Тілеген қонақтарға медициналық ұйымның қызметін таныстырып, патронаждың әмбебап-прогрессивті моделін енгізу барысы жөнінде баяндады. Делегация мүшелері патронаждық медбикелердің тәжірибелік жұмысымен танысып, цифрлық шешімдердің қолданылуын бағалап, медициналық деректерді жинау мен жүргізу жүйесінің ұйымдастырылуын көрді.
Сондай-ақ, мамандарды жабдықтауға ерекше көңіл бөлінді: медициналық сөмкелер, диагностикалық құрылғылар және пациенттердің үйіне бару кезінде пайдаланылатын құралдар таныстырылды.
Патронаждың әмбебап-прогрессивті моделі тәуекел деңгейін ескере отырып, жүкті әйелдерге, жаңа туған нәрестелерге және жас балаларға жүйелі бақылау жүргізуді қамтамасыз етеді. Бұл тәсіл ауытқуларды дер кезінде анықтауға, алдын алу шараларын жүзеге асыруға, ата-аналарды бала күтімі дағдысына үйретуге және медициналық көмектің қолжетімділігін арттыруға мүмкіндік береді.
Мамандардың айтуынша, бұл модель еліміздің барлық емханасында, соның ішінде №36 қалалық емханада да енгізілген және алғашқы медициналық-санитарлық көмек көрсетудің, әсіресе ана мен бала денсаулығын сақтау саласында, міндетті стандарттарының бірі болып табылады.
Мұндай сапарлар халықаралық тәжірибені ескере отырып, Қазақстандағы медициналық-санитарлық алғашқы көмек жүйесін одан әрі дамытуға және жетілдіруге ықпал етеді деп күтілуде.