Алматы қаласының Түрксіб ауданындағы №83 гимназияда «Қазақстан балалары» жобасы аясында жас суретшілер байқауы өтті. Шараны Алматы қаласы Төтенше жағдайлар департаменті ұйымдастырды.
Байқаудың басты мақсаты – балаларға өрт қауіпсіздігі жөнінде түсінік беру, өрт сөндірушілердің күнделікті жанқиярлық еңбегін бағалауға баулу болды. Балалар өз қиялдарындағы өрт сөндіруші бейнесін қағаз бетіне түсіріп, «тілсіз жауға» қарсы күресті бояулармен бейнеледі.
Жас суретшілер өрт сөндірушілердің батыл әрекеттерін көркем тілмен жеткізуге тырысып, әр туындыда отқа қарсы тұрудың маңыздылығын ұғындыра білді.
– Бұл байқау балалар үшін ғана емес, ата-аналар үшін де пайдалы болды, – дейді №83 гимназия директорының тәрбие ісі жөніндегі орынбасары Вера Казанцева.
– Балалар сурет сала отырып, өрт кезінде не істеу керектігін, құтқарушылардың ерлік істерін үйреніп, түсінді. Байқауға Түрксіб ауданының мектептерінен алпысқа жуық оқушы қатысты. Қорытындысын кәсіби суретшілер шығарады. Жеңімпаздар мен жүлдегерлерге грамоталар табысталады. Алайда ең маңыздысы – балалар өрттің алдын алу мен қауіптің алдын қалай алу керектігін түсінді.
Байқау Халықаралық балаларды қорғау күніне арналған іс-шаралар аясында ұйымдастырылған. Мұндай тәрбиелік мәні зор бастамалар балалардың қауіпсіздік мәдениетін қалыптастыруда маңызды рөл атқаратыны сөзсіз.