Іле Алатауы мемлекеттік ұлттық паркінде өрт жиілейтін маусымға дайындық жұмыстары басталды. Іле Алатауы ұлттық паркінің Медеу филиалына қарасты орман өртінен қорғау станциясының бастығы Дәулет Жетпісбаев өңірлік коммуникациялық қызметінде өткен пресс-конференцияда осылай деді, деп хабарлайды aqshamnews.kz
«2005 жылғы 4 ақпан күнгі №026-н/К қаулының аясында ұлттық парктегі техникаға тексеру жүргізіліп, өртті сөндіруге арналған құрал-жабдықтарды жаңартып, әр станцияда 300 литр бензин мен 200 литр дизель отынынан үлкен қор жасап қойдық», - деп атап өтті Жетпісбаев.
Парктегі 4 бөлімшенің әрқайсысында орман өртін сөндіретін 4 топ пен 33 адам жұмыс істейді. «Инспекторлардың 131 аты, 100 комплект киімі бар. Бұдан бөлек, паркте 4 өрт сөндіретін көлік, 2 арнаулы машина, 10 трактор мен 2 су жеткізетін құрылғы тағы бар»,- деп атап өтті ол.
Сондай-ақ, инспекторларды оқытуға дайындық аяқталып, Алматы аумақтық инспекциясының өкімі бойынша кейіннен тестілеу арқылы 36 сағаттық оқыту ұйымдастырылды.
Оның айтуынша, осы даярлық жұмыстарының аясында 22 бақылау мұнарасы мен тікұшаққа арналған алаңды жөндеуден өткізіп, 228,5 шақырым болатын өрт кезінде қатынайтын жол қалпына келтірілмек.
«Техникалық жағынан ұлттық парк қандай жағдайға болсын дайын. Біз, сонымен бірге, өртті болырмас үшін 40 мың парақ үлестіріп, осы аумақта орналасқан жердің иелеріне арнап 85 ескертпе таратып шықтық», - деп түйіндеді Жетпісбаев.