Оқу-ағарту министрі Ғани Бейсембаев Ұлыбританияға жұмыс сапарымен барды.
Онда ол білім беру технологияларының халықаралық көрмесіне қатысты, деп хабарлайды Almaty-akshamy.kz министрліктің сайтына сілтеме жасап.
Ведомство басшысы IT-сала өкілдерімен және Microsoft, Google, Lenovo, Good Tech Advisory ірі халықаралық компанияларының білім беру сегментінің басшыларымен келіссөздер жүргізді.
Кездесу барысында тараптар цифрлық технологияларды дамыту перспективалары мен қазіргі заманғы әлемдік трендтерді, сондай-ақ білім берудегі жасанды интеллекттің мүмкіндіктері мен әсерін талқылады. Ғани Бейсембаев кездесуге қатысушыларға Қазақстанда оқытудың инновациялық әдістерін енгізу бойынша қабылданып жатқан шаралар туралы айтып берді.
«Мемлекет цифрлық инфрақұрылымды нығайтуға және цифрлық индустрияны, атап айтқанда, жасанды интеллектті дамытуға ерекше назар аударады. Салалық ведомство білім беруді цифрлық трансформациялау бағытында жан-жақты жұмыс жүргізуде. Өткен жылы еліміздің бір өңірінде біз «Цифрлық технологияларды қолдана отырып, шағын жинақталған мектептердің әлеуетін дамыту» жобасын іске қостық. Оқулықтар электронды форматқа көшірілді. Бүкіл жүйені цифрландыру бойынша кезең-кезеңімен жан-жақты жұмыс жүргізілуде. Қазір бізге білім беру сапасын арттыру үшін жасанды интеллектті қолдану бойынша жетекші елдердің озық тәжірибесі қызықты», - деп атап өтті ҚР Оқу-ағарту министрі.
Lenovo бас директоры Крис Бабсон мен Lenovo білім беру сегментінің жаһандық басшысы Стюарт Кинг өз компанияларының жасанды интеллект саласындағы дамуына тоқталды. Мамандардың айтуынша, ол оқытуға қол жеткізу кедергілерін азайту және басқару процестерін автоматтандыру арқылы жаһандық білім беру мақсаттарына жету процесін жеделдету мүмкіндігіне ие.
«Жасанды интеллект күнделікті тапсырмаларды орындау арқылы мұғалімдердің уақытын үнемдей алады. Бұл мұғалімдерге оқытылатын сабақтың сапасымен жұмыс істеуге және оқушылармен өзара әрекеттесуге көбірек уақыт береді. Технологияларды қолдану әрбір оқушы үшін оның жеке ерекшеліктері мен қажеттіліктерін ескере отырып, тиімді оқу бағдарламаларын құруға мүмкіндік береді», — деді ірі халықаралық компанияның өкілдері.
Сондай-ақ, сапар аясында министр «Bett Show» халықаралық білім беру технологиялары көрмесіне қатысты. Бұл білім беру саласындағы электроника өндірісіне негізделген әлемнің 700-ден астам компаниясы қатысатын ірі салалық көрмелердің бірі.