Сеул соты Оңтүстік Кореяның бұрынғы президенті Юн Сок Ёльге 2024 жылы елде әскери жағдай енгізуге ұмтылғаны және құқық қорғау органдарының оны қамауға алу әрекетіне кедергі келтіргені үшін 5 жыл түрме жазасын кесті, - деп хабарлайды aqshamnews.kz тілшісі.
Yonhap агенттігінің дерегінше, сот оны іс бойынша тағылған негізгі айыптар бойынша кінәлі деп таныған. Ал экс-президенттің қорғаушылары үкімге апелляция беретінін айтты.
Бұдан бөлек, әскери жағдай жариялау арқылы «бүлік ұйымдастырды» деген айыппен жеке іс қаралып жатыр. Осы аптада арнайы прокурорлар бұл іс аясында өлім жазасын сұраған. Сот шешімі 19 ақпанда шығарылады деп күтіледі.
Жалпы алғанда, Юн Сок Ёль сегіз іс бойынша сот алдында жауап беріп жатыр. Олардың қатарында әскери жағдай енгізуге талпыныс, жұбайына қатысты ықтимал сыбайлас жемқорлық күдігі және 2023 жылы теңіз жаяу әскерінің қаза табуына байланысты айыптар бар.
Еске салайық, Юн Сок Ёль 2024 жылғы желтоқсанда әскери төтенше жағдай енгізбек болды деген айыппен импичментке ұшыраған. Конституциялық сот бұл шешімді 2025 жылғы 4 сәуірде ресми түрде бекітті. 2025 жылдың қаңтарында ол қызметте жүрген кезінде қамауға алынып, наурызда бостандыққа шыққан. Алайда тергеуге ықпал ету қаупі бар деген уәжбен кейіннен екінші мәрте қайта қамауға алынды.
