Бостандық ауданындағы №90 балабақшада өткен «Мен өнерлі баламын» атты мерекелік кешті тамашалағандар кішкентай өнерпаздардың өнеріне тәнті болды. Әсте, «өнерлінің өрісі кең» деген тәмсіл тегін айтылмаса керек. Балалардың бірі ән салса, бірі би билеп, енді бірі тақпақ оқып кештің көрігін кіргізді. Кеш бағдарламасы да өте тартымды ұйымдастырылған.
Бұл ретте іс-шараның «режиссері» музыкалық жетекші Диана Бахытжанқызының қолтаңбасы айқын сезіледі. Бүлдіршіндерді өнерге баулып, сахнаға дайындаған С.Саурбаева, Н.Колхозбекова, Н.Қайкенова, Х.Арыстан, А.Дүйсембаева сынды тәрбиешілердің еңбегін де атап өткен орынды. Ал кештің жүргізушісі Гүлдана Ахаева мерекелік кештің мазмұнды өтуіне зор үлес қосты.
Шара соңында №90 балабақша меңгерушісі Гүлімжан Смайлқызы қолдау көрсеткен ата-аналар мен педагогтар еңбегіне алғыс білдірді. Мерекелік кеш кішкентай өнерпаздардың шығармашылық қабілетін дамытып, олардың өнер әлеміндегі қадамына айналды.