Шетелдік және оң жақ рөлді көліктерді inDrive қызметінен 2025 жылға дейін толық шығарады
Қазақстандағы inDrive қызметінен шетелдік және оң жақ рөлді көліктер 2025 жылдың басына дейін толықтай шығарылады. Бұл туралы Көлік министрі Марат Қарабаев пен сервистің негізін қалаушы Арсен Томский арасындағы кездесудің нәтижесінде белгілі болды. Тараптар сондай-ақ агрегатор, Көлік министрлігі және Ішкі істер министрлігі арасындағы жылдамдық режиміне қатысты мәліметтер алмасу мәселесін талқылады, деп хабарлайды aqshamnews.kz
Кездесу барысында inDrive өкілдері 1 сәуірден бастап платформасында оң жақ рөлді көліктерді тіркеуге рұқсат берілмейтінін мәлімдеді. Сонымен қатар, Көлік министрлігі мен Ішкі істер министрлігімен жасалған меморандумға сәйкес, 2025 жылдың 1 қаңтарынан бастап бұрын тіркелген «оң жақ рөлді» көлік жүргізушілері сервисінен шығарылады. Мұндай шектеулер шетелдік көліктердің иелеріне де қатысты болады.
Өз кезегінде Қарабаев жолаушылар тасымалының қауіпсіз, бәсекеге қабілетті және өркениетті нарығын құрудың маңыздылығын атап өтті. Осы тұрғыда ведомство басшысы такси қызметіне қойылатын негізгі талаптарды еске салды:
- жүргізушілер рейс алдындағы медициналық тексеруден өтуі, еңбек және демалыс режимін, сондай-ақ жылдамдық режимін сақтауы тиіс;
- такси қызметіне пайдаланылатын көлік Қазақстанда тіркелуі және жылына екі рет техникалық тексеруден өтуі керек.
Сонымен қатар, Көлік министрлігі қалааралық тасымалдау үшін шектеулер енгізу мәселесі талқылау сатысында екенін атап өтті. Ведомство ақпарат жинауды жалғастырып, такси компанияларымен келіссөздер жүргізуде.
30 шілдеде үкіметтегі брифингте Марат Қарабаев ведомствоның такси агрегаторларына ұзақ қашықтыққа жүруге тыйым салғысы келетінін мәлімдеді. Кейіннен inDrive компаниясы қалааралық тасымалдаулардың ыңғайлы екенін айтып, Көлік министрлігінен бұл мәселені барлық тараппен талқылауды сұрады.
Кейіннен, сын-пікірлер толқынынан кейін, Көлік министрлігі таксилерге қалааралық тасымалдауларға тыйым салу туралы қоғамдық тыңдаулар өтетінін мәлімдеді. Сондай-ақ, министрліктің жоспары бойынша, «Яндекс.Такси» және InDrive жүргізушілерін күнделікті Face ID және медициналық тексеруден өтуге міндеттемек.