Абай университетінде қазақ тіл білімінің көрнекті өкілі, филология ғылымдарының докторы, ҚР ҰҒА академигі Өмірзақ Айтбаевтың 90 жылдығына арналған «Ғылымды дамытудағы қоғамдық ұйымдардың рөлі» атты ғылыми-практикалық дөңгелек үстел өтті. Тағылымды іс-шара Халықаралық қазақ тілі қоғамы және Филология ғылымдары зерттеулерін сараптамалық үйлестіру орталығымен бірлесіп ұйымдастырылды. Келелі жиынға университет басшылығы, елімізге белгілі ғалымдар және тіл жанашырлары мен академиктің туыстарықатысты, – деп хабарлайды aqshamnews.kz тілшісі.
Өмірзақ Айтбаев – саналы ғұмырын қазақ тіл білімін өркендетуге, мемлекеттік тілдің қоғамның барлық саласында орнығуына арнаған тұлға.Ғалымның зерттеулері отандық лингвистиканың, соның ішінде терминология саласының қалыптасуы мен дамуына зор ықпал етті. Академик бұл бағыттың бастауында тұрған Ахмет Байтұрсынұлы дәстүрін жалғап, жаңа деңгейге көтерді. Өмірзақ Айтбаев саналы ғұмырында 500-ден астам ғылыми еңбек, 20-дан астам монография мен оқу құралдарын шығарды.
Алқалы жиынды Филология ғылымдары зерттеулерін сараптамалық үйлестіру орталығының президенті, академик Кәрімбек Құрманәлиевтің модератор ретінде жүргізіп, қайраткердің қоғамдық және ғылыми қызметін баяндады. Дөңгелек үстелді кіріспе сөзбен ашқан Абай атындағы ҚазҰПУ-дың Басқарма Төрағасы-Ректоры Болат Тілепмерейтойдың мән-маңызына тоқталып, оны ғылым онкүндігі аясында өткізудің айрықша сипаты бар екенін айтты.
– Өмірзақ Айтбаевтың 90 жылдығы ғылым декадасымен тұспа-тұс келуінің символикалық мәні бар. Өйткені ғылым – қоғам дамуының негізгі қозғаушы күші. Ал ғылымның ілгерілеуі тек ғалымдардың еңбегіне ғана емес, қоғамдық институттардың қолдауына да тікелей байланысты. Осы тұрғыдан алғанда, елімізде тіл ғылымының дамуына айрықша үлес қосқан құрылымдардың бірі – Халықаралық қазақ тілі қоғамы. Оның қалыптасуына Әбдуәли Қайдар, Рабиға Сыздық, Шора Сарыбаев, Мырзатай Жолдасбеков және Өмірзақ Айтбаев сынды тұлғалар өлшеусіз еңбек сіңірді, – деді ректор.
Жиын барысында ғылыми қауымдастық өкілдері академиктің тіл саясаты, терминология және қазақ тілін ғылым тілі ретінде дамыту бағытындағы еңбектерін жан-жақты талқылады. ҚР ҰҒА академигі Ерден Қажыбек ғалымның ғылыми ұстанымдары мен тұлғалық болмысына тоқталып, қазақ терминологиясын жүйелеудегі тарихи рөлін айрықша атады. Филология ғылымдарының докторы, профессор Қалбике Есенова қазіргі қазақ тілінің даму үдерістерін саралап, академик еңбектерінің бүгінгі цифрландыру дәуірімен сабақтастығын ғылыми тұрғыда негіздеді.
Сонымен қатар Анар Фазылжан, Анар Салқынбай, Жаңалық Балтабаева сынды ғалымдар қазақ тілінің өзекті мәселелері бойынша пікір білдіріп, қоғамдық ұйымдардың ғылыми үдерістерді үйлестірудегі маңызына, халықаралық ынтымақтастықты кеңейтуге қатысты ұсыныстарын ортаға салды. Алматы қаласындағы тіл саясатын жүзеге асыру тәжірибесі жөнінде Бақыт Қалымбет баяндама жасап, өңірлік жобалардың тиімді тұстарын атап өтті.
Басқосу соңында қатысушылар ғылым мен қоғам байланысын нығайту, ғылыми зерттеулердің сапасын арттыру және мемлекеттік тілдің мәртебесін көтеру бағытындағы бастамаларды жүйелі жалғастыру қажеттігін баса айтты.Тағылымды кездесу мерейтойлық сипатпен шектелмей, қазақ тілінің ғылым кеңістігіндегі орны мен болашағына қатысты маңызды ойлар тоғысқан мазмұнды пікір алаңына айналды.