Қаржылық жоспарлау – тек бүгінгі шығынды есептеу емес, ертеңгі күнге сенімді қор қалыптастыру. Сарапшылардың айтуынша, қаржылық тәуекелдерді азайтып, ұзақ мерзімді мақсаттарға жүйелі түрде жетудің тиімді құралдарының бірі – өмірді жинақтаушы сақтандыру (ӨЖС).
Aqshamnews.kz тілшісіне бұл өнімнің қыр-сырын Fingramota.kz порталы мамандарының ұсынған деректері негізінде талдау жасап көрді.
Өмірді жинақтаушы сақтандыру: болашаққа сенімді жоспар
Қаржылық жоспарлау – тек бүгінгі табыс пен шығынды есептеу емес, болашаққа сенімді капитал қалыптастыру. Мамандардың айтуынша, қаржылық тәуекелдерді азайтып, ұзақ мерзімді мақсаттарға жетудің тиімді құралдарының бірі – өмірді жинақтаушы сақтандыру (ӨЖС).
Өмірді жинақтаушы сақтандыру (ӨЖС) деген не?
Өмірді жинақтаушы сақтандыру – жинақ пен сақтандыру қорғанысын біріктіретін қаржылық құрал. Клиент тұрақты түрде жарна төлеп, қаражат жинайды. Сонымен қатар шарт мерзімі ішінде күтпеген жағдайлардан сақтандыру қорғанысына ие болады.
Классикалық сақтандыруда төлем тек сақтандыру жағдайы болғанда ғана жасалса, ӨЖС-те төленген қаражат мерзім соңында кепілдендірілген кіріспен қайтарылады. Егер күтпеген жағдай орын алса, төлем жақындарына беріледі.
Яғни бұл – әрі ақша жинау, әрі отбасының қаржылық қауіпсіздігін қамтамасыз ету тәсілі.
Айырмашылығы қандай? (Қысқа мысал)
Ай сайын 50 000 теңгеден 10 жыл төлейсіз делік.
Классикалық сақтандыруда:
Егер сақтандыру жағдайы болмаса, төленген қаражат қайтарылмайды. Бұл – тек қорғаныс.
Өмірді жинақтаушы сақтандыруда:
50 000 × 12 ай × 10 жыл = 6 000 000 теңге жиналады.
Оған шарттағы пайыз есептеледі. Мерзім соңында бұл сома кіріспен бірге қайтарылады. Ал күтпеген жағдай орын алса, сақтандыру төлемі қарастырылады.
Сондықтан ӨЖС – қорғаныс пен жинақты біріктіретін құрал.
Қандай мерзімге рәсімделеді?
ӨЖС әдетте 5 жылдан 20 жылға дейін жасалады. Мерзім ұзарған сайын кірістілік те артады. Мысалы:
1 жылға дейін – шамамен 1,5%;
10 жылға – 5%;
15 жылға – 5,75%;
20 жылға – 6,5%-ға дейін (АҚШ долларымен).
Сарапшылар ұзақ мерзімді шарт тиімді екенін айтады.
Жарна көлемін клиент өзі анықтайды. Көп жағдайда ай сайын табыстың 5–10%-ын аудару ұсынылады. Тоқсандық, жартыжылдық немесе жылдық төлемдер де қарастырылған.
Жас шектеуі
ӨЖС шартын 18 жастан бастап рәсімдеуге болады. Балалар 14 жастан бастап сақтандырылушы бола алады. Полис мерзімі аяқталған кезде сақтандырылған адамның жасы 63-тен аспауы тиіс.
Бұл құралды ата-аналар баланың біліміне, баспана алуға немесе қаржылық «жастық» қалыптастыруға жиі пайдаланады.
Мерзімінен бұрын бұзу
Шартты 12 ай өткен соң бұзуға болады. Алайда бұл жағдайда төлем азайтылып есептеледі және компания тәуекел үшін белгілі бір соманы ұстап қалады. Сондықтан ӨЖС-ті ұзақ мерзімді құрал ретінде қарастырған дұрыс.
Өмірді жинақтаушы сақтандыру – қаржылық тәртіп қалыптастырып, болашаққа жүйелі түрде қаражат жинауға мүмкіндік беретін құрал. Ол күтпеген жағдайларда отбасының қаржылық қауіпсіздігін қамтамасыз етеді және ұзақ мерзімді жоспарлау кезінде тиімді шешім бола алады.
Мамандар шарт талаптарын мұқият оқып, сақтандыру компаниясының сенімділігіне назар аударуға кеңес береді. Қаржы нарығын реттеу жән дамыту агенттігі мамандарының түсіндіруінше, қаржылық сауаттылықты арттыру үшін Fingramota.kz секілді арнайы порталдардағы ақпараттарды пайдалану маңызды.