Өмірінің алғашқы минуттарынан бастап Алматы қаласындағы №2 Қалалық перинаталдық орталықтың үлкен мамандар командасы сәбидің өмірі үшін күрес жүргізді, – деп хабарлайды aqshamnews.kz тілшісі.
Нәресте мерзімінен бұрын дүниеге келіп, салмағы небәрі 950 грамм болды. Жағдайы аса ауыр еді: ауыр дәрежедегі респираторлық дистресс-синдром және терең морфофункционалдық жетілмеушілік анықталды.
Өмірінің алғашқы минуттарынан бастап Алматы қаласындағы №2 Қалалық перинаталдық орталықтың үлкен мамандар командасы сәбидің өмірі үшін күрес жүргізді. Алғашқы 60 күн бойы нәресте реанимация және қарқынды терапия бөлімшесінде ем қабылдады. Оның ішінде 38 тәулік жасанды өкпе желдету аппаратында болды.
Әрбір күн оңайға соққан жоқ. Дәрігерлер тәулік бойы баланың жағдайын бақылап, емдеу тактикасын түзетіп, әлі толық жетілмеген ағзаның қызметін қолдап, сәбидің біртіндеп күш жинап, сауығуына бар күш-жігерін салды.
Осы күрделі жолда нәрестеге медициналық көмек көрсеткен дәрігерлердің бірі – неонатолог-реаниматолог дәрігер Наргиза Оскарова. Неонаталдық қызметтің жұмысын директордың неонаталдық қызмет жөніндегі орынбасары Айнурым Сарбас үйлестірді.
Қазір кішкентай пациентке 63 күн толды. Ең қиын кезең артта қалды. Қазіргі уақытта ол жаңа туған нәрестелер патологиясы бөлімшесіне ауыстырылып, әрі қарайғы күтімі мен емін дәрігер Акерке Тұрғынбек жүргізуде.
Бұл оқиғаның артында даңғаза сөздер жоқ. Мұнда екі ай бойы нәрестенің өмірі үшін күрескен, оның сауығу жолындағы ең маңызды қадамдарын жасауына көмектескен №2 Қалалық перинаталдық орталық дәрігерлерінің, мейіргерлерінің және барлық қызметкерлерінің күнделікті қажырлы еңбегі жатыр.
Сәбидің анасы ұлының өміріндегі ең қиын әрі алаңдаушылыққа толы күндерде кәсіби шеберлік, қамқорлық және қолдау көрсеткен орталықтың медицина қызметкерлеріне шынайы алғысын білдірді.
Бүгінгі күні нәрестені алда қалпына келудің жаңа кезеңі күтіп тұр. Ал оның жанында бұрынғыдай өсуіне, күш жинауына және сауығуына көмектесуді жалғастырып жатқан білікті мамандар бар.