Қостанай облысына жұмыс сапары барысында Премьер-министр Олжас Бектенов өңірдің әлеуметтік-экономикалық даму перспективалары, өндірістік кәсіпорындар және кадрлық әлеуетті арттыру мәселелерін талқылады. Сонымен қатар, бірыңғай уақыт белдеуіне көшу мәселесі ерекше назарға алынды, деп хабарлайды aqshamnews.kz
Кездесуде тұрғындар бірыңғай уақыт белдеуіне көшу табиғи уақытқа сәйкес келіп, күнделікті тұрмысты жеңілдеткенін айтып, бұл шешімді қолдады.
Премьер-министр бұл шешімнің терең ғылыми зерттеулер негізінде қабылданғанын атап өтті. Ол 2017 жылы америкалық ғалымдардың адамның циркадтық ырғағын зерттегені үшін Нобель сыйлығымен марапатталғанын еске салды. Ғылыми дәлелдер табиғи уақыт белдеуіне сәйкестіктің адам денсаулығы мен әл-ауқатына оң әсер ететінін көрсетеді. Бұл негізде 2022 жылы Барселона декларациясы қабылданып, 80-нен астам елдің ғалымдары мен саясаткерлері табиғи уақыт белдеуіне көшуді қолдады.
«Қазақстан үшін табиғи уақыт белдеуі – біз қазір өмір сүріп жатқан UTC+5. Бұрын біз директивалық тәртіппен табиғи емес UTC+6 белдеуінде өмір сүрдік. Бұл шешім кейбір адамдар үшін бастапқыда қолайсыздық тудыруы мүмкін, бірақ уақыт өте ағза бейімделеді. Біз азаматтардың өмірін барынша жеңілдету үшін жарықтандыру, кесте ұйымдастыру және басқа да инфрақұрылымдық шараларды жүзеге асырамыз», – деді Премьер-министр.
Кездесуде зауыт ұжымдары еңбек жағдайлары мен қолдау шараларын талқылады. Олжас Бектенов Мемлекет басшысы жариялаған «Жұмысшы мамандықтары жылы» қарсаңында еңбеккерлердің құқығы мен әл-ауқатын қамтамасыз етуге баса назар аударылатынын айтты.