Республикалық дирижерлер конкурсына өтінім қабылдау жалғасып жатыр, деп хабарлайды aqshamnews.kz ҚР Мәдениет және ақпарат министрлігінің баспасөз қызметіне сілтеме жасап.
2025 жылдың 8-10 қазан аралығында Қазақстан Республикасы Мәдениет және ақпарат министрлігінің қолдауымен Жамбыл атындағы Қазақ мемлекеттік академиялық филармониясында Қазақстанның халық әртісі, Мемлекеттік сыйлықтың лауреаты, Халық қаһарманы, күйші-композитор, дирижер Нұрғиса Тілендиевтің 100 жылдығына арналған республикалық конкурс өтеді.
Конкурстың басты мақсаты – Қазақстан дирижерлік мектебінің дәстүрін сақтау, оны кеңінен насихаттау, кәсіби мамандармен шығармашылық ынтымақтастық орнату, дирижерлік шеберлікті жетілдіру, сондай-ақ дарынды жас дирижерлерді қолдау.
Байқау ұлттық мәдениеттің деңгейін көтеру және Қазақстанның мәдени имиджін арттыруға бағытталған. Аталмыш байқауға Қазақстан Республикасының музыкалық өнер саласындағы 18 бен 35 жас аралығындағы талантты жастар мен жоғары оқу орындарының студенттері қатысады.
Конкурс 2 кезеннен тұрады. Қатысушылар Нұрғиса Тілендиев атындағы академиялық фольклорлы-этнографиялық «Отырар сазы» оркестрінің сүйемелдеуімен музыкалық шығармаларды орындайды. Жеңімпаздарды сала мамандарынан құралған білікті қазылар алқасы анықтайды.
2025 жылдың 10 қазан күні Жамбыл атындағы Қазақ мемлекеттік академиялық филармонияның Үлкен залында іс-шара қорытындыланып, жеңімпаздарды марапаттау рәсімі өтеді.