Алматының қысы қалың қарымен ерекшеленіп, тұрғындардың күнделікті өміріне елеулі қиындықтар туғызатыны белгілі. Осыған орай, Нұр-Мүбарак Египет ислам мәдениеті университетінің проректоры, PhD доктор Ершат Оңғардың бастамасымен университет аумағын және жақын маңдағы көшелерді қардан тазарту мақсатында қысқы сенбілік ұйымдастырылды, деп хабарлайды aqshamnews.kz
Бұл шараның басты мақсаты – университет ұжымын, студенттер мен оқытушыларды ортақ іске жұмылдыру, сондай-ақ мешітке келушілер мен қала тұрғындарына қолайлы жағдай жасау болды.
Қатал ауа райына қарамастан, сенбілікке 100-ден астам адам белсене қатысты. Студенттер, оқытушылар және мешіт қызметкерлері оқу кешені аумағын қардан тазартып, көрші көшелер мен аулаларды да назардан тыс қалдырмады. Бұл ізгі іс-шара жергілікті тұрғындардың ризашылығын тудырып, олар университет ұжымына алғыстарын білдірді.
Проректор Ершат Оңғар сенбіліктің маңыздылығына тоқталып:
«Ислам – тазалық діні. Қасиетті Құран мен Пайғамбарымыздың (оған Алланың игілігі мен сәлемі болсын) хадистерінде тазалықтың ерекше орын алатыны айтылған. «Тазалық – иманның жартысы» деген хадис мұсылман өмірінің негізін айқындайды. Сонымен қатар, «Көрші ақысы – Құдай ақысы» деген сөз көршіге көмек көрсетудің мұсылмандық міндет екенін еске салады», – деп атап өтті.
Бұл сенбілік барысында Нұр-Мүбарак университетінің ұжымы ауызбіршіліктің, ынтымақтың және ортақ іске деген адалдықтың жарқын үлгісін көрсетті. Іс-шара қала тұрғындарына Ислам дінінің тазалыққа ерекше мән беретінін іс жүзінде дәлелдеді және оларды да игі істерге шабыттандырды.