Қазақстандық киберспортшы Даниил Голубенко Бразилияның Furia командасы сапында FISSURE PLAYGROUND 2 турнирінде жеңіске жетті, - деп хабарлайды Аqshamnews.kz тілшісі.
21 қыркүйекте CS2 (Counter-Strike - еск.) ойыны бойынша FISSURE PLAYGROUND 2 турнирінің финалы өтті.
Финалда моңғолиялық The Mongolz пен қазақстандық ойыншы Даниил Голубенко өнер көрсететін бразилиялық Furia клубы кездесті.
Қорытынды бойынша турнир жеңімпазы болып бразилиялық команда танылды. Есеп – 3:2.
Турнирдің жүлде қоры - 500 мың доллар(271 миллион теңге), оның ішінде жеңімпазға 200 мың доллар (108 миллион теңге) берілді.
Ойыннан кейін қазақстандық киберспортшыға турнирдің ең үздік ойыншысы (MVP) медалі табысталды.
Турнир барысында Даниил 18 карт ойнап, орташа жеке рейтингі 1,19 болды.
Жүлдеге қол жеткізгеннен кейін 20 жастағы қазақстандық ойыншы аргентиналық жұлдызды форвард Лионель Мессидің әйгілі суретін қайталады. Даниил Голубенко трофейді құшағына алып, үстіне Қазақстан туын жамылып, ұйықтап жатқандай кейіп танытып, суретін әлеуметтік желіге жүктеген.
Бұл суретке киберспорт әлемінің ғана емес, көптеген танымал тұлға пікір білдірген.
Олардың ішінде Бразилия ұлттық құрамасының және "Сантос" клубының шабуылшысы, әлемдік футбол жұлдызы Неймар да бар.
