Қырғыз билігі бұрынғы президент Курманбек Бакиевті және экс-премьер Сапар Исаковты елге қайтару мәселесін белсенді түрде талқылауда. Бұл туралы Aqshamnews.kz сайты хабарлайды.
Қырғызстан президенті Садыр Жапаров «Кабар» агенттігіне берген сұхбатында Ресей мен Беларусь бұл саяси тұлғаларды экстрадициялауға дайын екенін, алайда басты шарт – оларды түрмеге қамауға болмайтынын мәлімдегенін айтты.
"Біз бұл мәселе бойынша ойланудамыз. Мүмкін алдымен Сапар Исаковты елге әкеліп, оны жылу электр орталығын жаңғырту мен музейді қайта құру кезіндегі сыбайлас жемқорлыққа қатысты тергеу керек шығар? Ол кім қанша ақша алғанын ашық айтуы тиіс", – деді Жапаров.
Сонымен қатар, экс-президент Бакиевтің қаржылық активтері мен жоғалған алтын концентраты да тергеуге алынатыны белгілі болды.
"Біз оны 2010 жылғы сәуір және маусым оқиғаларының екінші тарабы ретінде тыңдап, бұл іске соңғы нүкте қоя алар едік. Халық 15 жылдан бері олардың қайтарылуын талап етіп келеді", – деп толықтырды мемлекет басшысы.
Жапаров Бакиевтің ұлы Максим Бакиев пен інісі Жаныш Бакиевке қатысты да пікір білдірді. Егер олар Қырғызстанға оралса, бірден түрмеге тоғытылатынын баса айтты.
"Максим Бакиев елге келсе, біз оны қамауға алып, миллиарды қайтарып алар едік", – деп мәлімдеді президент.
Курманбек Бакиевтің Қазақстан арқылы қашуы және сот үкімі
2010 жылы сәуір айында болған революцияның нәтижесінде Курманбек Бакиев биліктен тайдырылып, Қазақстанға Нұрсұлтан Назарбаевтың көмегімен қашып келген. Кейін ол Беларусьтен баспана алып, сол елде тұрақтады.
Қырғызстан соты оны 2010 жылы митингке шыққандарды атқызғаны үшін 30 жылға бас бостандығынан айыру жазасына сырттай кескен болатын.
Қазіргі таңда Қырғызстан билігі Бакиевтер әулетінің елге қайтуын ұйымдастыруға тырысып жатыр, алайда бұл процестің қалай жүзеге асатыны белгісіз.