Алматы қаласындағы SOS балалар ауылында тәрбиешілер мен психологтарға арналған «Конфликтология және медиация негіздері. Этномедиацияның ерекшеліктері мен қағидалары» тақырыбында семинар-тренинг өтті.
Білім жетілдіру дәрісін Алматы қаласы ҚХА этномедиация кеңесінің төрағасы, «Халықаралық құқық қорғау орталығы» РҚБ Президенті Жанділдә Жақыпов қайырымдылық негізде өткізді. Сондай-ақ, Ассамблеяның «Жомарт жан» орталығы балаларға арналған қайырымдылық акциясын ұйымдастырды. Игі шараны Алматы қаласы Әділет басқармасының «Қоғамдық келісім» КММ, «Ассамблея жастары», «Жомарт жан» орталығы және Алматы қаласы Қазақстан халқы Ассамблеясының Ақсақалдар кеңесі бірлесіп ұйымдастырды.
«Мемлекет басшысы Қасым-Жомарт Тоқаевтың тапсырмасына сәйкес елімізде Наурызнама тұжырымдамасы бекітілген болатын. Бүгін біз соның аясында Алматы қаласындағы SOS балалар ауылына келдік. Бұл шара Қазақстан халқы Ассамблеясының 30 жылдығына арналған маңызды іс-шаралардың бірі екенін айта кеткен жөн. «Жомарт жан» қайырымдылық орталығының өкілдері балаларға деп тренингтер мен ойындарға арналған құрал-жабдықтарды сыйға тартты. Сонымен қатар, Қазақстан ұйғырларының республикалық мәдени орталығының төрағасы Долкунтай Абдулхалил түрлі сыйлықтарын ала келді. Кездесу аясында балаларға Наурыз мерекесінің мән-маңызын түсіндіріп, түрлі ойындар ұйымдастырды. Балаларға қуаныш сыйлаған бұл шара – халқымыздың береке-бірлігінің, бауырмалдығының дәлелі», – дейді Алматы қаласы ҚХА ақсақалдар кеңесінің төрағасы Болат Оспанов.
«Жомарт жан» орталығының төрағасы Долкунтай Абдулхалилдің айтуынша, Президентіміз жастарды елін сүйетін, білімді, адал, жауапкершілігі мол азамат етіп тәрбиелеуге ерекше көңіл бөліп отыр. Осы мақсатта біз де өз жұмысымызды жандандырып, түрлі игі істерді қолға алдық. Бұл бастамаға Ассамблея жанындағы Ақсақалдар кеңесі мен белсенді жастар бірлесіп атсалысты.
«Балаларға сыйлықтар мен түрлі тарту жасап, мерекелік көңіл-күй сыйладық. Ассамблея аясында біз жастармен жиі кездесіп, оларды еліне адал қызмет ететін, туған елінің дамуына үлес қосатын азамат ретінде тәрбиелеуге күш салып келеді. Ынтымақтастықты арттырып, жастардың патриоттық рухын көтеру – басты мақсаттарымыздың бірі. Қазір «Таза Қазақстан» бағдарламасы қолға алынды. Осы науқан да жастарды тәрбиелеудің бір бағыты. Бір адамның немесе белгілі бір топтың міндеті емес. Сондықтан баршамыз біріге жұмыс істеп, ортақ мақсатқа ұмтылуымыз керек. Наурыз мерекесі құтты болсын! Әрбір шаңыраққа бақыт, ынтымақ, қуаныш тілеймін! Еліміз тыныш, халқымыз аман болсын!», – деді ол.