Наурызнама онкүндігі аясындағы «Тазару күніне» орай Алматы жастары ерекше белсенділік танытып, қала тұрғындары үшін ауқымды мәдени іс-шара ұйымдастырды, - деп хабарлайды aqshamnews.kz
Бүгін Астана алаңында қала жастарының бастамасымен мерекелік концерт өтті. Іс-шара барысында Алматының талантты жастары сахнаға шығып, ән айтып, би билеп, өнер көрсетті. Концертке жиналған тұрғындар мен қала қонақтары жастардың өнерін ыстық ықыласпен қабылдап, Наурыз мерекесінің ерекше атмосферасын бірге сезінді.
Концерттен кейін «Таза ой – Таза қоғам» атты ауқымды флешмоб ұйымдастырылды. Оған 500-ден астам жас қатысып, «Тазару» ұғымының қоршаған ортаны тазарту ғана емес, сонымен қатар адамның ойы мен ниетінің тазалығын білдіретін маңызды құндылық екенін көрсетті.
Флешмоб басталар алдында жастарға ішкі мәдениет, жауапкершілік және қоғамға пайдалы болудың маңызы туралы қысқаша үндеу жасалды.
Сонымен қатар, Тазару күніне орай Алматы жастары таңертеңнен бастап әлеуметтік желілерде «Өзіңнен баста» челленджін бастады. Челлендждің негізгі идеясы — әр адам тазалық пен тәртіпті алдымен өзінен бастап, қала ортасының көркеюіне үлес қосуы.
Жастар тазалық акцияларына қатысқан сәттерін фото және бейне форматта жариялап, өзгелерді де игі іске шақырды. Челлендж аясында жарияланымдар әлеуметтік желілерде #Тазарукүні #ТазаҚазақстан хэштегтерімен таралуда.
Алматы қаласының белсенді жастарының бірі Бейбіт Жасұланұлы мұндай бастамалардың маңыздылығын атап өтті:
«Тазару күні – бұл тек айналаны тазалау емес, ең алдымен адамның өзіне, ойы мен іс-әрекетіне жауапкершілікпен қарауы. Біз жастар ретінде қаламыздың таза, көрікті әрі мәдениетті болуы өзімізден басталатынын жақсы түсінеміз. Осындай бастамалар арқылы әрбір жас қоғамға пайдасын тигізіп, ортақ құндылықтарды нығайтуға үлес қоса алады», – деді ол.
Ұйымдастырушылардың айтуынша, мұндай бастамалар жастардың экологиялық мәдениетін арттыруға, қоғамдық жауапкершілікті нығайтуға және «Таза Қазақстан» идеясын кеңінен насихаттауға бағытталған.