Наурызда өткен Ұлттық бірыңғай тестілеуге 179 мыңға жуық адам қатысты, – деп хабарлайды aqshamnews.kz тілшісі. Талапкерлердің 75 пайызы тестті қазақ тілінде, 25 пайызы орыс тілінде, ал 157 адам ағылшын тілінде тапсырған.
Ғылым және жоғары білім министрлігінің мәліметінше, тест тапсырғандардың 70 пайызы шекті балл жинаған. Бес пән бойынша орташа көрсеткіш 66 балды құрады. Ең жоғары нәтиже – 140 балл. Бұл көрсеткішке Атырау облыстық дарынды балаларға арналған ұлттық гимназия түлегі Жазира Кеңесова қол жеткізді. Ол төрт пәннен 90 балл жинап, ҚАЗТЕСТ сертификаты арқылы «Қазақ тілі» пәні бойынша балын конвертациялаған. Нәтижесінде жалпы көрсеткіші 140 балл болған.
Талапкерлер тест аяқталғаннан кейін 30 минут ішінде тапсырмалардың мазмұны бойынша апелляция бере алған. Ал техникалық себептерге қатысты өтініштер тест барысында қабылданған. Бұл жолы 31 мыңнан астам өтініш түсіп, соның ішінде 17 тапсырма бойынша апелляция қанағаттандырылған. Қазір республикалық комиссия жұмысын аяқтап, сертификаттар талапкерлердің жеке кабинеттеріне жүктелген.
Таңдау пәндері арасында ең көп сұранысқа ие комбинация – «Математика-Физика». Оны талапкерлердің 18,7 пайызы таңдаған. Екінші орында 16,5 пайызбен «Биология-Химия» пәндері тұр. Ал үздік үштікті 10,3 пайыз көрсеткішпен «Шығармашылық емтихан» комбинациясы түйіндеді.
ҰБТ барысында ереже бұзудың 264 дерегі тіркелген. Оның ішінде 130 талапкер смартфон, шпаргалка және өзге де тыйым салынған заттарды алып кірмек болғаны үшін тестке жіберілмеген. Тағы 134 адам тест кезінде тәртіп бұзғаны үшін аудиториядан шығарылып, олардың нәтижесі жойылған.