Борышын өтеген алматылық сарбаз ата-анасымен жүздесті
Наурызбай ауданында ер балаларды әскерге шығарып салу рәсімі өтті, деп хабарлайды Almaty-akshamy.kz Almaty.tv-ге сілтеме жасап.
Күзгі мерзімді әскери қызметке шақыру науқанына орай ұйымдастырылған іс-шараға әскери қызметкерлер, ардагерлер мен жастар қатысты. Үрмелі оркестрдің орындауындағы патриоттық әндер шырқалып, ұлттық ән-би сахналанды. Биыл аудан бойынша көктемде 150 бала әскерге аттанған, күзде тағы 200 азамат сарбаз атанбақ.
«Шараның мақсаты – ауданымыздағы, қаламыздағы жастарды әскер қатарына шақыру, патриоттық рухта тәрбиелеу. Желілерде ой туындап жатады. Әскерге келудің, соның қыр-сырын сарбаздардың өзін шақырып, қандай екенін айтқызып, жастарды борышын өтеуге шақырып жатырмыз», – деді Наурызбай ауданы әкімінің орынбасары Мирас Нысанәлиев.
Салтанатты іс-шара кезінде әскери қызметін Шымкент қаласында үздік атқарған алматылық сарбаз арнайы шақыртылып, ата-анасымен жүздесті. Келер буынға үлгі болсын деген ұйымдастырушылар тосын сый жасапты.
«Қуанышымызда шек жоқ. Әкімшілікке, военкомат басшылығына рахмет! Балалар аман-есен барып келді. Бүгін бізге тосын сый жасады. Балалар барсын, әр баланың міндеті – борышын өтеу», – деді ата-ана Қабыланбек Қаракүшіков.