Қазнетте жедел жәрдем қызметкерлері көшеде жатқан науқасты тепкілеген видео тарады. Денсаулық сақтау министрлігі бұл видеоға қатысты пікір білдірді, - деп хабарлайды aqshamnews.kz тілшісі.
Бұған дейін әлеуметтік желілер мен БАҚ-та жедел жәрдем қызметкерлері орындықта ұйықтап жатқан ер адамды аяғымен теуіп түсірген сәті бейнеленген видео тараған еді. Видео авторларының айтуынша, кадрда Қазақстанның жедел жәрдем қызметі өкілдері науқасты тиісті медициналық көмек көрсетпестен көшеде қалдырып кеткен.
Қазақстан Денсаулық сақтау министрлігінің ресми мәлімдемесі
"Жүргізілген талдау нәтижесі видеоға түсірілгендердің Қазақстанның жедел жәрдем қызметкерлері емес екенін көрсетті: олардың формасында ҚР жедел медициналық жәрдем бригадаларына міндетті мемлекеттік және ведомстволық айырым белгілері жоқ. Киімнің түс гаммасы мен үлгісі де Қазақстанда қолданыстағы бірыңғай стандартқа сәйкес келмейді", – делінген министрлік мәлімдемесінде.
Сонымен қатар, бұл оқиға 2024 жылғы 11 наурызда Ресейдің Волгоград қаласында болғаны және сол кезде ресейлік БАҚ-та кеңінен жарияланғаны анықталды. Тексеру қорытындысы бойынша кінәлілер жауапкершілікке тартылған.
"Осылайша, бұрыннан белгілі әрі тексерілген оқиғаны Қазақстанның қызметтерімен байланыстыруға тырысу - азаматтарды әдейі жаңылыстыру", – деп атап өтті Денсаулық сақтау министрлігі.
Министрлік паблик әкімшілерін және ақпараттық ресурстардың авторларын қазақстандықтардың шынайы ақпарат алу құқығын құрметтеуге, жарияламас бұрын дереккөздерді тексеруге және мемлекеттік, әлеуметтік және медициналық қызметкерлерді әдейі қаралау мақсатындағы материалдарды таратпауға шақырды.