Алматы қаласының Креативті индустрияларды дамыту орталығы Almaty Creative Нархоз университетімен және Қазақстанның Креативті индустриялар альянсымен ынтымақтастық туралы меморандумға қол қойды, деп хабарлайды aqshamnews.kz Алматы әкімдігінің баспасөз қызметіне сілтеме жасап.
Альянспен ынтымақтастық Қазақстандағы саланың дамуына бағытталса, университетпен әріптестік студенттерге білім беру және мансаптық мүмкіндіктер ұсынады.
«Білім – креативті экономиканың іргетасы. Біз елдің алдыңғы қатарлы университеттерімен серіктестік орнатып, жас таланттарға креативті индустрияда табысты мансапқа қажетті білім мен ресурстар беруге қуаныштымыз. Бүгін біз осы миссияда тағы бір маңызды қадам жасап, Нархоз университетімен әріптестік орнаттық», – деп атап өтті Almaty Creative орталығының бас директорының міндетін атқарушы Бахыт Елюбаева.
Нархоз университетінің эндаумент қорының жетекшісі Дана Шаяхметтің айтуынша, Almaty Creative – қаланың креативті индустрияларын дамытатын бірегей ұйым.
«Біздің серіктестігіміз зерттеулер мен білім беру бағдарламаларының бағыттарын нығайта түседі», – деді ол.
Нархоз Almaty Creative серіктестері қатарына қосылған тоғызыншы жоғары оқу орны болды. Бұған дейін бұл желіге Т. Жүргенов атындағы ҚазҰӨА, AlmaU, Тұран университеті, Құрманғазы атындағы Қазақ ұлттық консерваториясы, әл-Фараби атындағы ҚазҰУ, ҚазҰАУ, «Әділет» колледжі және Еуропалық дизайн институты (IED) қосылған болатын.