Бүгін мегаполисте ауқымды сенбілік өтті. "Таза Қазақстан" экологиялық бағдарламасының кезекті маусымы аясында ағаш отырғызатын аумақтар белгіленіп, көшелер, қоғамдық кеңістіктер, парктер, саябақтар, жағалау аймақтары мен су айдындары тазартылды. Іске волонтерлер, жастар, қоғам белсенділері, мәдениет және спорт қайраткерлері тартылды.
Негізгі санитарлық жұмыстар "Достық" паркінде өтті. Бұл орын тұрғындардың өтінішіне байланысты арнайы таңдалған.
Эко-белсенді Евгений Мұхамеджанов та тазалық шарасына қатысып, екінші рет өңдеуге болатын шикізатты (қалдықтарды) өңдеу жобаларын таныстырды.
"Біз адамдарға экология туралы айтып жүрміз: күн сайын қоқысты сұрыптауды әдетке айналдыру қажет. Кешенді жұмыс керек, тұрғындарды қызық интерактивтерге тартып, барлық іс-шараны экологияландыру маңызды", - деді Евгений Мұхамеджанов.
Акцияға ҚР еңбек сіңірген мәдениет қайраткері, Қазақ радиосының ардагері Аманжан Енсебайұлы да келді. Ол Алматыны абаттандыру — әрбір қала тұрғынының парызы екенін атап өтті.
"Таза Қазақстан" республикалық бағдарламасы - Алматыны одан әрі жайлы, тартымды етуге бағытталған нақты қадам. Бұл бастама табиғатқа және қоршаған ортаға деген құрметтің көрінісі. Ата-бабаларымыз "Шөпті таптама, жұлма" деген. Бұл мұра экологиялық мәдениетті қалыптастыруда ерекше рөл атқарады. Әсіресе жастарға сұлулыққа, тазалыққа, мәдениетке дұрыс көзқарас дарыту маңызды. Мұндай сенбіліктерді мен тәрбие мектебі деп бағалаймын", - деді Аманжан Енсебайұлы.
Айта кетейік, қалалық сенбіліктің қорытындысы бойынша шамамен 1 мың ағаш және 3 мың бұта отырғызылды. 8 мың тонна қоқыс жиналып, шығарылды. Барлығы 13 мыңнан астам адам қатысып, 350 техника бірлігі жұмылдырылды.