Бұл туралы Өңірлік коммуникациялар қызметінің брифингінде Наурызбай ауданының әкімі Назира Асылбекқызы Тоғызбаева мәлімдеді, – деп хабарлайды aqshamnews.kz тілшісі.
2025 жылы Наурызбай ауданында «Шұғыла» және «Құрамыс» шағынаудандарында жалпы 5 500 орынға арналған 3 жаңа мектеп пайдалануға берілді.
Ал 2026 жылы №223 және №41 жалпы білім беретін мектептер әрқайсысы 1 200 орынға, сондай-ақ №15 санаторлық мектеп-интернаты 340 орынға пайдалануға берілді. Бұдан бөлек, №174 мектеп-гимназиясының 375 орындық қосымша ғимараты іске қосылды.
Мектепке дейінгі ұйымдардағы орын тапшылығын азайту мақсатында 2025 жылдың қыркүйегінде «Шұғыла» шағынауданында 320 орындық балабақша ашылды.
2026 жылдың соңына дейін Наурызбай ауданында тағы 3 жаңа балабақша ашу жоспарлануда. Қазіргі таңда нысандардың құрылыс жұмыстары толық аяқталып, пайдалануға беру үшін қажетті құжаттарды рәсімдеу жұмыстары жүргізілуде.
Жаңа балабақшалар «Қалқаман» және «Құрамыс» шағынаудандарында, сондай-ақ «Нұрлы Дала» тұрғын үй кешенінде орналасқан. Атап айтқанда, Қалқаман шағынауданындағы №207 балабақша 240 орынға, «Құрамыс» шағынауданындағы №203 балабақша және «Нұрлы Дала» тұрғын үй кешеніндегі №204 балабақша 320 орынға есептелген.
Жаңа мектептер мен балабақшалардың пайдалануға берілуі аудан тұрғындары үшін білім беру қызметтерінің қолжетімділігін арттырып, білім беру ұйымдарындағы орын тапшылығын кезең-кезеңімен азайтуға мүмкіндік береді.