Алматыда «Таза Қазақстан» республикалық акциясы аясында ауқымды сенбілік өтті, деп хабарлайды aqshamnews.kz
Қаладағы барлық сегіз аудан қамтылып, тазалық жұмыстарына 7 мыңнан астам алматылық атсалысты.
Әуезов ауданы. Мұнда тұрғындар, еріктілер, мемлекеттік қызметшілер мен коммуналдық қызмет өкілдері бірігіп, Үлкен батыр көшесінің бойында (Абай даңғылынан Жұбанов көшесіне дейінгі аралықта) аумақты қоқыстан тазартты. Дворлар мен жаяу жүргінші жолдары ретке келтіріліп, ағаштар мен көгалдар қураған жапырақтардан арылды. Сенбілікке 700-ге жуық адам қатысты.
«Бұл шара тұрғындарды қала абаттандыруға тарту үшін ұйымдастырылды. Адам өз қолымен көгалдандырған аумағын таза ұстауға тырысады. Бүгінгі сенбілік – тек Алматының тазалығына қосқан үлес емес, сонымен қатар адамдардың танысып, жаңа достар табуына да мүмкіндік берді», – деді аудандық әкімдік өкілі Айгерім Исалиева.
Қатысушыларға арнайы футболкалар беріліп, көңілді әуен ойнатылды. Jas Volunteers еріктілері мен зейнеткерлер де белсенділік танытты.
Алатау ауданы. Бұл аудандағы сенбілік №213 мектеп аумағында өтті. Іс-шараға 300-ден астам адам, сондай-ақ 10 жүк тиегіш техника мен 30 жүк көлігі жұмылдырылды. Мектеп маңы қоқыстан тазартылып, арамшөптер орып тасталды, жаяу жүргіншілер жолдарына жарық шамдары орнатылды.
Басқа аудандар.
- Алмалы ауданында сенбілік «АРО» саябағында және бірқатар көшелерде өтті.
- Наурызбай ауданында – Төле би көшесінің бойында.
- Түрксіб ауданында – «Нижняя Пятилетка» шағын ауданында, №1 теміржол вокзалы маңында.
- Бостандық ауданында – №105 гимназия аумағында.
Осылайша сенбілік Алматының барлық ауданын қамтып, қала тұрғындары, еріктілер, коммуналдық қызмет пен мемлекеттік органдар өкілдері бірлесе еңбек етті. Нәтижесінде Алматы тазарып қана қоймай, тұрғындардың ортақ іске деген жауапкершілігін арттырды.