Алматы қаласы бойынша Қылмыстық атқару жүйесі департаментіне қарасты №11 мекемесіне Әбілхан Қастеев атындағы Мемлекеттік өнер музейінің өкілі келіп, дәріс өткізді, деп хабарлайды aqshamnews.kz.
Аталған балалар колониясында жазасын өтеп жатқан жасөспірімдерге ұлттық музейдің гид-экскурсоводы, мәдени мұра ескерткіштерін қорғау бойынша сарапшы Оксана Танская «Қазақстандық Тутанхамон» деген тақырып төңірегінде танымдық әңгіме өрбітті. Дәрісте скиф кезеңінің, Алтын адамның тарихы, сақ қорғандарының археологиялық олжалары егжей-тегжейлі баяндалды.
– Осындай іс-шаралар жасөспірімдердің эстетикалық талғамын арттырып, тарихымызды құрметтей білуге үндейді деп білемін. Сондай-ақ кез-келген танымдық кеш аяғын жаза басқан жастарға өмірдің мәнін түсіндіруде, жаман жолға түсіп кетпей, өзіне, отбасына, қоғамға пайдалы іспен айналысуына болатын жолдарды көрсетуде үлкен рөл атқаратыны сөзсіз, – дейді №11 мекеме бастығының міндетін атқарушы әділет подполковнигі Нұрлан Керебаев.