Алматыда референдумға танымал қазақстандық әнші, «МузАрт» тобының солисі Кенжебек Жанәбілов қатысты. Өнер иесі отбасымен бірге «Бәйтерек» халықаралық мектеп-лицейінде орналасқан №512 сайлау учаскесіне келді.
«МузАрт» тобының әншісі референдумға қатысу елінің болашағына алаңдайтын әрбір азаматтың борышы екенін атап өтті.
«Біз еліміздің дамуына бірнеше жыл бойы әсер етуі мүмкін шешімдерге немқұрайлы қарамауымыз керек. Референдум – пікірімізді білдіріп, ортақ іске үлес қосуға мүмкіндік», – деді Кенжебек Жанәбілов.
Естеріңізге сала кетейік, бүгін Қазақстан аумағында АЭС салу мәселесі бойынша республикалық референдум өтуде. Алматы әкімі Ерболат Досаев жұбайымен бірге таңертең №48 мектеп-лицейдегі №388 сайлау учаскесіне келіп, дауыс беруге қатысты. Алматылықтар тұрғылықты жері бойынша сайлау учаскелеріне барып, сағат 20.00-ге дейін өз дауыстарын бере алады.