Өнерде шекара жоқ. Жақында Санкт-Петербург Сыртқы байланыстар комитетінің бастамасымен және Ресей ынтымақтастығының қолдауымен Санкт-Петербургте «Мұражай тәжірибелері: сақтаудан бастап қатысуға дейін» атты кәсіби даму бағдарламасы ұйымдастырылды. Бұл бағдарламаға Алматыдағы Әбілхан Қастеев атындағы ҚР Мемлекеттік өнер музейінің қызметкерлері де қатысты, деп хабарлайды aqshamnews.kz
Санкт-Петербург Сыртқы байланыстар комитетінің шақыруымен Қазақстан, Беларусь, Тәжікстан, Армения, Әзірбайжан және Оңтүстік Осетия елдерінің 21 мұражайынан 34 маман жиналды. Олар бір апта бойы Санкт-Петербургтің мәдени мекемелерінің жұмысын зерттеп, үздік тәжірибелерімен танысуға мүмкіндік алды.
Бағдарлама барысында Ресейдің саяси тарихы Мемлекеттік музейі негізінде қатысушылар үшін дәрістер, шеберлік сыныптары және семинарлар өткізілді. Тақырыптар қатарында мұражай қызметін есепке алу және сақтау, мұражай заттары мен коллекцияларын цифрландыру, экспонаттарды сипаттау әдістері, халықаралық көрмелер ұйымдастыру, балалар бағдарламаларын әзірлеу және өткізу, жаңа аудиторияны тарту жолдары сынды мәселелер қамтылды.
– Мәнді әрі мазмұнды оқу бағдарламасы аясында біз Ресейдің саяси тарихы Мемлекеттік музейіне, Санкт-Петербургтің мемлекеттік тарих мұражайына, Петропавл бекінісіне, Ресей этнографиялық мұражайына, «Балтық үйі» театр-фестиваліне, Ленинградтың мемлекеттік қорғаныс және блокада мемориалдық мұражайына, тарихи тәрбие беру Балалар мұражай орталығына және Ресей мемлекеттік өнер мұражайына бардық. Бұл бізге руханият әлемінен мол мағлұмат алуға мүмкіндік берді. Жас мамандарға мұндай жобалар өте қажет. Үйренгенімізді өзімізде қолдануға әзірміз, – дейді өнертану магистрі, Әбілхан Қастеев атындағы ҚР Мемлекеттік өнер музейінің баспасөз хатшысы Ақбота Әлімхожина.
