Қазақстандық дзюдошы Әбиба Әбужақынова Парижде өткен Олимпиада ойындарында қола медалға күресіп сәтсіздікке ұшыраған соң әлеуметтік желідегі парақшасында халыққа арнап жазба жариялады, деп хабарлайды aqshamnews.kz
"Мені қолдап, жүлдесіз қалғаныма қарамастан жылы лебіздеріңізді арнап жатқандарыңызға рақмет! Мен бұл күнді ұзақ күткен едім. Қазақстан әйелдер дзюдосының тарихын жаңартуға бар күшімді салғаныммен, өзім ойлағандай нәтижеге қол жеткізе алмадым...", - деп жазды спортшы.
Әбиба Әбужақынова халықтан кешірім сұрап, өз жазбасында былай деп айтты:
"Маған сенген баршаңыздың үміттеріңізді ақтай алмағаным үшін кешірім сұраймын! Мен мұнымен тоқтап қалмаймын! Мықты болып ораламын!"
Қазақстандықтар спортшы қыздың намысшыл екеніне тәнті болды. Әбиба Әбужақынова өзінің жігерлілігі мен қайсарлығы арқылы көптеген жанкүйерлердің жүрегін жаулап алды. Оның алдағы жарыстарда үлкен жетістіктерге жететініне сенім мол.
Әбужақынованың өзіне артылған үмітті ақтау үшін бар күш-жігерін салатынына сенім білдірген жанкүйерлері оның келесі жарыстарына табыс тілеп, қолдау көрсетуді жалғастыратынын айтты.