2025 жылдың 3 ақпанында Алматы қаласындағы «Достық үйінде» көрнекті жазушы, Қазақстанның Халық жазушысы, Мемлекеттік сыйлықтың иегері Мұхтар Мағауиннің 85 жылдық мерейтойына арналған «Мұхтар Мағауин – Ұлы жазушы, ғұлама тарихшы» атты республикалық ғылыми-тәжірибелік конференция өтті, деп хабарлайды aqshamnews.kz
Конференцияны Қазақстан Жазушылар одағының төрағасы Мереке Құлкенов ашып, Мұхтар Мағауиннің қазақ әдебиеті мен руханиятына қосқан үлесі туралы айтты.
Іс-шарада белгілі қаламгерлер мен ғалымдар жазушының шығармашылығына талдау жасап, оның қазақ тарихын көркемдік шеберлікпен бейнелеудегі рөлін атап өтті.
Сонымен қатар, ақындар Ұлықбек Есдәулет, Ақұштап Бақтыгереева, жазушы Зейнеп Ахметова, қоғам қайраткері Асылы Осман және басқа да тұлғалар жүрекжарды лебіздерін білдірді.
Конференцияда ақындар Қорғанбек Аманжол мен Бақытбек Бәмішұлы арнау өлеңдерін оқып, әнші Нұргүл Әлқожа «Ескі жұрт» толғауын орындады. Күйші Шәміл Әбілтаев «Ақсақ құлан» және «Қубас» күйлерін тарту етті.
Шарада Мұхтар Мағауин атындағы шығармашылық орталық ашу, ескерткіш орнату және оның әдеби мұрасын жаңғырту ұсынылды. Сонымен қатар жазушының өмірі мен шығармашылығына арналған бейнематериалдар көрсетілді.
Конференция Мағауиннің ұлттық руханияттағы орнын айқындап, оның шығармашылығының болашақ ұрпақ үшін құнды мұра болып қалатынын дәлелдеді.