Алматыда «Жол жүрісі туралы» Заңға енгізілген өзгерістерге сәйкес мопедтерді тіркеу басталды. Бұл туралы Өңірлік коммуникациялар қызметінде өткен брифингте Алматы қаласы Полиция департаменті әкімшілік полиция басқармасының Процессинг орталығының басшысы Айдын Меркімбаев мәлім етті, деп хабарлайды aqshamnews.kz
Биылғы жылдың 11 қаңтарынан бастап мопед иелері тіркеу рәсімінен жеңілдетілген тәртіппен өте алады. ҚР Ішкі істер министрлігі қажетті құжаттардың тізбесін әзірледі. Мопедтің жақтауында сәйкестендіру нөмірі болмаса да тіркеуге рұқсат етіледі. Еліміздегі алғашқы тіркелген екі дөңгелекті көлік өткен аптада Алматыда техникалық паспорт пен мемлекеттік тіркеу нөмірін алды.
Қазірдің өзінде қалада 60 мопед ресми тіркеуден өткен. Полиция мопед иелеріне арналған ақпараттық жадынамалар мен құжаттар тізімі көрсетілген кітапшаларды таратуда. Материалдар транспорт иелері көп жиналатын жерлерде, сондай-ақ бұқаралық ақпарат құралдары мен әлеуметтік желілер арқылы қол жетімді.
2025 жылдың 5 сәуірінде күшіне енетін жаңа заңнамалық түзетулерге сәйкес, мопедтер механикалық автокөліктерге теңестіріледі. Мұндай көлікті пайдалануға полицияда тіркеуден өткен жағдайда ғана рұқсат етіледі. Сонымен қатар, мопед иелері А1 санатындағы жүргізуші куәлігін алуы тиіс.
Айдын Меркімбаевтың айтуынша тіркеу эксаумақтық қағидаты бойынша жүзеге асырылады және барлық мопед иелері үшін процесті жеңілдетеді. Алматы полициясы заңнама талаптарын сақтаудың маңыздылығын еске салып, жүргізушілерді болашақта болуы мүмкін құқық бұзушылықтардың алдын алу үшін тіркеу рәсімінен уақтылы өтуге шақырады.