"Зауыттың өзінде қант 350 теңге тұрады".
Ауыл шаруашылығы министрі Айдарбек Сапаров қанттың бағасына бақылауда ұстауға уәде беріп, алыпсатарларға ескерту жасады, деп хабарлайды aqshamnews.kz
Былтыр Қазақстанда қант қызылшасының рекордтық көлемі жиналған болатын. Соның арқасында қант өндіру көлемі өсті.
"Биыл біз 128 мың тонна қант өндірдік. Қазір 30-40 проценті сатылған шығар. Ал қалғаны қоймаларда жатыр, бәріне жетеді. Дегенмен бағаны бақылап отыру керек. Осы жайында сауда министрімен де сөйлестік. Бүгінде жұмыс тобы бар. Бағаны бақылауда ұстайтын боламыз", - деді Сапаров.
Оның айтуынша, бағаны алыпсатарлар көтереді. Ал зауыттың өзінен қанттың бір келісі 350-380 теңгеге сатылады.
"Менде статистика бар. Оған сәйкес, дүкендерде қант 400-420 теңгеден сатылады. Бұл – республика бойынша орташа бағаның көрсеткіші. Біз қанттың бағасын тағы қараймыз. Шекті баға бар, оған қосылатын үстеме бар. Оның мөлшері 15 проценттен аспауы қажет. Одан асып кетсе, сауда орындарына айыппұл салатын боламыз", - деді министр.