Жоғары аудиторлық палатаның төрағасы Әлихан Смайылов Мәжілісте ауыл шаруашылығы саласына жүргізілген тексерудің нәтижелерімен бөлісті, деп хабарлайды aqshamnews.kz
Анықталған бұзушылықтар таң қалдырарлық. Экономикалық маңыздылығы жоғары сала болғанына қарамастан, ауыл шаруашылығының ЖІӨ-дегі үлесі өте төмен – орта есеппен небәрі 5%.
Себептері неде? Негізгі себептер қатарында төмен өнімділік, суармалы жерлердің баяу өсуі, суды тиімсіз пайдалану, тасымал-логистика инфрақұрылымының әлсіз дамуы, материалдық-техникалық базаның жеткіліксіздігі және тағы басқалары атап өтілді.
«Соңғы бес жылда бюджеттен субсидиялауға шамамен екі триллион теңге бөлінді. Алайда, жүйелік мәселелер олардың тиімділігін шектеп тастады. Бірінші себеп – стратегиялық жоспарлаудың олқылықтары мен саланы дамытудағы сабақтастықтың болмауы. Соңғы 10 жылда Ауыл шаруашылығы министрлігі бірнеше бағдарламалық құжаттарды қабылдады. Бірақ олардың көбі аяқсыз қалды. Құжаттардың барлығы жүзеге асу барысында, орта жолда күші жойылды немесе аяқсыз қалды», – деп атап өтті Смайылов.
Қызығы неде? Миллиардтар жұмсалғанымен, нәтиже қайда? Әлихан Смайылов бұл қаржының үлкен бөлігінің тиімді пайдаланылмағанын және мемлекет алдағы жоспарлау мен субсидиялау жүйесіне шұғыл түрде өзгерістер енгізуі қажет екенін қадап айтты. «Шешімдер қағаз жүзінде қалды, енді нақты әрекет қажет», – деді ол.
Еліміздің ауыл шаруашылығындағы ауқымды мәселелер тек қаржылық емес, стратегиялық жоспарлаудағы кемшіліктерден де туындағаны анық. Ал бұл – саладағы жағдайды түбегейлі өзгерту қажеттігінің дабылы.