20 жастағы алматылық мәнерлеп сырғанаушы Михаил Шайдоров жақында ғана Харбиндегі Азия ойындарында үшінші нәтиже көрсеткен еді. Енді міне, Сеулде «Төрт құрлық» турнирінде алдымен қысқа бағдарламаны, содан кейін ерікті бағдарламаны жеңіп алды. Сондай-ақ, ол өз өнерімен жарыстың шымылдығын жапты.
Алғаш рет жас жігіт алты жасында коньки тебе бастады. Мәнерлеп сырғанаудан республиканың бірнеше дүркін чемпионы атанған ол жаттығуды әкесі Станислав Шайдоровтың басшылығымен бастады. Содан кейін 2018 жылы Сочидегі жаңа жаттықтырушыға ауысады. Бүгінде ол Ресейден келген бірінші Олимпиада чемпионы Алексей Урмановтың қоластында жаттығады. Шайдоров – Урманов тандемін қазір спорт сүйерқауым жақсы біледі. Алғашқы жетістік 2022 жылғы жасөспірімдер арасындағы әлем чемпионатында болды. Содан кейін қазақстандық күміс жүлдегер атанып, екі қойылымның нәтижесі бойынша америкалық Илья Малининнен жеңіліп қалды. Михаил бұған дейін екі жыл қатарынан «Төрт құрлық» турнирінде бесінші орынға тұрақтаған еді, 2024 жылы 6-орын нәтижесін көрсетті.
Сонымен қатар, ол ересектер арасындағы үш әлем чемпионатына қатысқан спортшы. Соңғы екеуінде Михаил планетаның үздік 14 спортшысының қатарына еніп, екі рет Гран-при жүлдегері атанды. Биылғы жыл жерлесіміз үшін сәтті басталғанын жанкүйер қауым жақсы біледі. Көптеген сарапшылар жақында Азия ойындарының жеңімпазы атанған Чхан Чжун Хванға артықшылық берген еді. Мұз иесінің деңгейінен асып түсу қиынның қиыны. Алайда, қазақстандық мәнерлеп сырғанаушыға музыканы қателесіп қою да кедергі болмады. Жарыста оның композициясы қойылмады. Қазылар алқасымен сөзге келуге тура келді. Оның музыкасы ойнаған кезде, ол өзінің бағдарламасын екі квадратты, соның ішінде квадрат луцты (барлық коньки тебушілер орындауға батылы жетпейтін күрделі секіру) орындай отырып, мінсіз орындады. Сонымен қатар, ерекше аксель және басқа да компоненттер орындалды. Бұл оның жоғары баға жинауына мүмкіндік берді. Михаил Шайдоровтың мансабындағы алғашқы ірі жеңіс. Айтпақшы, осыдан тура 10 жыл бұрын дәл осы аренада тағы бір алматылық Денис Тен жеңімпаз атанған еді. Өзіне дейінгі спортшының осындай жетістігін еске алған Михаил турнир алдында: «Денис әлемге Қазақстанда мәнерлеп сырғанау бар екенін паш етті. Енді менің де жер жаһанға бұл туралы жариялауыма мүмкіндік бар» деген еді.
Михаил Қазақстанда жаңа чемпиондар өсіп келе жатқанын тағы бір дәлелдеді.