Қазақстан Үкіметі бюджеттік қаражатты тиімді пайдалануға және қаржылық тәртіпті нығайтуға бағытталған шаралар қабылдады. Осы шаралардың нәтижесінде мемлекеттік аппарат шығыстары 410 миллиард теңгеге қысқартылды, деп хабарлайды aqshamnews.kz
Әлеуметтік саланы цифрландыру арқылы бюджетті игеруде ашықтық қамтамасыз етіліп, қаражаттың тиімді жұмсалуы бақылауға алынды. Мысалы, балабақшаларды қаржыландыруда айқындық орнату мақсатында Тараз, Шымкент, Түркістан және Орал қалаларында мектепке дейінгі білім берудің ваучерлік жүйесі пилоттық негізде іске қосылды. Бұл жоба нәтижесінде 20 миллиард теңге үнемделді. Жыл соңына дейін ваучерлік жүйені елдің барлық өңірінде енгізу жоспарлануда.
- Сонымен қатар, «Әлеуметтік әмиян» арқылы атаулы мемлекеттік қолдауды күшейту қолға алынды. Бұл құрал балалардың тамақтануы мен мұқтаж жандарға арналған дәрі-дәрмек төлемдерін қамтамасыз етуде маңызды рөл атқаруда.
- Имидждік іс-шаралар мен іссапар төлемдері сияқты ағымдағы шығындарды қысқарту да бюджеттің үнемделуіне айтарлықтай үлес қосты.
Бұл шаралар мемлекет шығындарын оңтайландырып, бюджеттік тәртіпті нығайтуға бағытталған маңызды қадам болып табылады.