Мемлекет басшысы Ұлттық банк төрағасы Тимур Сүлейменовті қабылдады

Қасым-Жомарт Тоқаев Ұлттық банк төрағасы Тимур Сүлейменовті қабылдап, экономика мен қаржы жүйесінің жай-күйі, қаңтар–қараша айларында жүргізілген ақша-несие саясатының негізгі бағыттары және 2026 жылға арналған жоспар жөнінде есеп тыңдады.

Кездесуде іскерлік белсенділік, инфляцияға ықпал ететін факторлар және бағаны тұрақтандыруға арналған шаралар талқыланды. Тимур Сүлейменовтің айтуынша, Үкімет, Ұлттық банк және Қаржы нарығын реттеу және дамыту агенттігі 2026–2028 жылдарға арналған макроэкономиканы тұрақтандыру және халықтың әл-ауқатын арттыру жөніндегі бірлескен іс-қимыл бағдарламасын жүзеге асыруға кірісті.

Ұлттық банк төрағасы қаржы, валюта және мемлекеттік бағалы қағаздар нарығындағы жағдай туралы да баяндады. Оның дерегінше, жыл басынан бері Ұлттық қордың валюталық активтері 4,8 миллиард долларға өскен. 11 айдағы инвестициялық табыс шамамен 8,2 миллиард долларды немесе 13,7 пайызды құрады.

Ал есепті кезеңде елдің алтын-валюта резервтері 16,3 миллиард долларға (36 пайызға) ұлғайып, 62,1 миллиард долларға жетті. Бірыңғай жинақтаушы зейнетақы қорының активтері қаңтар–қараша аралығында 2,6 триллион теңгеге (11,7 пайызға) өсіп, 25 триллион теңге болған.

Тимур Сүлейменов сондай-ақ жаппай цифрландыру барысы және Ұлттық банктің цифрлық жобалары туралы мәлімдеді. Әсіресе Антифрод орталығының жұмысы мен ұлттық цифрлық қаржы инфрақұрылымдарын технологиялық тұрғыдан іске асыруға баса назар аударылды.

Ақпаратқа сәйкес, Ұлттық банк баға тұрақтылығын сақтап, инфляцияны орта есеппен 5 пайыздық межеде ұстап тұру үшін «барлық қажетті шараларды» қабылдап жатыр.

Мемлекет басшысы Ұлттық банкке:

• инфляцияны төмендетуге,

• қаржы нарығының тұрақтылығын қамтамасыз етуге,

• цифрлық трансформация секторын жүйелі түрде дамытуға
  баса назар аударуды тапсырып, осы бағыттар бойынша бірқатар нақты тапсырма берді.